سماجی ماہرین ٹک ٹاک کے متنازع فلٹر ’بولڈ گلیمر‘ کے بارے میں کیوں فکرمند ہیں؟

معروف سوشل وڈیو شیئرنگ ایپ ٹک ٹاک کو یوں تو امریکا سمیت کئی ممالک اپنے لیے سلامتی جب کہ بعض ممالک اسے سماج میں فحاشی پھیلانے کے الزام میں پابندیوں اور تنقید کا نشانہ بنا چکے ہیں

تاہم اب ٹک ٹاک خوبصورتی بڑھانے کے ایک متنازع فلٹر ’بولڈ گلیمر‘ کی وجہ سے تنقید کی زد میں ہے، اور اس بار سماجی ماہرین بھی فکرمند نظر آتے ہیں

واضح رہے کہ ٹک ٹاک نے کچھ ہفتے قبل ہی ’بولڈ گلیمر‘ نامی بیوٹی فلٹر متعارف کرایا تھا، جس کا مقصد اسکرین پر لوگوں کی ’خوبصورتی‘ میں اضافہ کرنا تھا

ٹک ٹاک نے مذکورہ فلٹر کو پیش کرتے ہوئے اس کے کام کرنے کے طریقے کو واضح نہیں کیا تھا کہ مذکورہ فلٹر کس طرح کام کرتا ہے اور یہ کیسے اسکرین پر ایک عام شخص کی ’خوبصورتی‘ میں اضافہ کرتا ہے؟

تاہم زیادہ تر ماہرین کے مطابق ’بیوٹی گلیمر‘ میں مصنوعی ذہانت یعنی آرٹیفیشل انٹیلیجنس (اے آئی) کا استعمال کیا گیا ہے جو کہ ہر لڑکی کو سپر ماڈل اور لڑکوں کو ہیروز کی طرح خوبصورت دکھنے کی خوش فہمی میں مبتلا کرتا ہے

آخر کون ہے جو اسکرین پر خود کو خوبصورت دیکھ کر خوش نہیں ہوگا، سو عام لوگ تو ٹک ٹاک کے مذکورہ فلٹر کو استعمال کرتے ہوئے خوش دکھائی دے رہے ہیں، لیکن ماہرین نے اسے خطرناک قرار دیا ہے اور خدشہ ظاہر کیا ہے کہ مذکورہ فلٹر سے ’ڈیپ فیک‘ یعنی حقیقی نظر آنے والی جعلی وڈیوز اور تصاویر میں اضافہ ہو سکتا ہے

خبر رساں ادارے ’ایجنسی پریس فرانس‘ (اے ایف پی) کے مطابق ٹیکنالوجی اور مصنوعی ذہانت پر کام کرنے والے ماہرین اور محقق نے ٹک ٹاک کے ’بولڈ گلیمر‘ فلٹر کو ’زہریلی خوبصورتی‘ یا خطرناک قرار دیا ہے

سماجی ماہرین نے خدشہ ظاہر کیا ہے کہ اس سے کم عمر افراد اور خاص طور پر لڑکیوں میں خوبصورتی کے معیار اور پیمانے تبدیل ہوں گے اور ہر کوئی اپنی شخصیت سے مختلف نظر آنے کی کوشش کرے گا

علاوہ ازیں ٹیکنالوجی ماہرین کا ماننا ہے کہ مذکورہ فلٹر کو استعمال کرنے سے جعلی تصاویر اور وڈیوز میں اضافہ ہوگا، جسے ٹیکنالوجی کی زبان میں ڈیپ فیک کہا جاتا ہے

مصنوعی ذہانت پر کام کرنے والے ماہرین کے مطابق ٹیکنالوجی کی دنیا میں اے آئی ٹیکنالوجی کا استعمال کئی سال سے ہوتا آ رہا تھا، لیکن ٹک ٹاک نے اس کا بہترین استعمال ’بولڈ گلیمر‘ میں کیا ہے، جس سے تمام حقیقی چیزیں تبدیل ہو سکتی ہیں

یقیناً آپ کے ذہن میں یہ سوال کلبلا رہا ہوگا کہ آخر یہ بولڈ گلیمر فلٹر ہے کیا اور یہ کیسے کام کرتا ہے؟

دراصل یہ ایک بیوٹی فلٹر ایڈیٹر ہے، جو کہ عام طور پر سوشل میڈیا ایپس اور کیمروں میں موجود دیگر خوبصورتی بڑھانے والے فلٹرز کی طرح ہی کام کرتا ہے

تاہم اس کی خاص بات یہ ہے کہ یہ فلٹر اسکرین پر ہر عام شخص کی خوبصورتی کو اس قدر بڑھا کر پیش کرتا ہے کہ ہر ایک لڑکی خوبرو دوشیزہ سپر ماڈل کی طرح دکھائی دیتی ہے اور ہر لڑکا ہیرو نظر آتا ہے

مذکورہ فلٹر بظاہر سفید فام رنگت کو ترویج دیتا ہے اور ہر سانولی رنگت والے شخص کی جلد کو بھی نکھار دیتا ہے

صرف یہی نہیں، یہ فلٹر عام لڑکیوں کے ہونٹوں کو پرکشش بنانے کے لیے انہیں بڑا کرنے سمیت ان میں دیگر تبدیلیاں بھی کرتا ہے

اسی طرح یہ فلٹر چہرے، گردن، بالوں، کمر، چھاتی، ٹانگوں اور جسم کے دیگر حصوں کو بھی بولڈ اور گلیمرائیز کر کے ان کی ’خوبصورتی‘ میں بے حد اضافہ کرتا ہے

مذکورہ فلٹر عام طور پر درمیانی عمر کی خواتین کو نو عمر لڑکی جب کہ ادھیڑ عمر مرد حضرات کو نوجوانوں کی طرح پیش کرتا ہے، جس پر ماہرین نے اسے تنقید کا نشانہ بناتے ہوئے کہا ہے کہ فلٹر غیر حقیقی خوبصورتی کو ترویج دیتا ہے

یہ فلٹر بھی دوسرے بیوٹی یا فوٹو ایڈیٹنگ فلٹر کی طرح کام کرتا ہے، تاہم زیادہ تر ماہرین کا دعویٰ ہے کہ اس میں مصنوعی ذہانت کا استعمال کیا گیا ہے اور فلٹر ہر لڑکی کی تصویر اور وڈیو کو سپر ماڈلز کے جسمانی خد و خال کے مطابق ڈھالتا ہے

لیکن اس حوالے سے ٹک ٹاک کی انتظامیہ نے تاحال کوئی وضاحت نہیں کی اور ماہرین کی جانب سے کی جانے والی تنقید بھی پر کوئی جواب نہیں دیا۔