پاکستان پیپلز پارٹی کی قیادت نے اپنے ارکان سندھ اسمبلی کے دارالحکومت کراچی سے باہر جانے پر پابندی عائد کر دی ہے
تفصیلات کے مطابق جیسے جیسے سینیٹ انتخابات کی تاریخ قریب آرہی ہے، ہر جماعت اپنے امیدوار کی جیت کے لئے کوشاں اور اپنے ارکان پر نظر رکھتے ہوئے روابط کو تیز کررہی ہے
اسی سلسلے میں سینیٹ الیکشن میں کامیابی کو یقینی بنانے کے لئے پیپلزپارٹی کی قیادت نے اپنے ارکان سندھ اسمبلی کے کراچی سے باہر جانے پر پابندی عائد کر دی ہے
ذرائع کا کہنا ہے کہ پیپلزپارٹی کی قیادت نے تمام صوبائی وزراء کو کراچی سے باہر نہ جانے کی ہدایت کی ہے اور ارکانِ سندھ اسمبلی کو عمومی سرگرمیاں بھی محدود رکھنے کا کہا ہے
ذرائع کے مطابق پیپلز پارٹی ارکانِ سندھ اسمبلی کو کراچی میں متحرک رکھنے کے لئے دعوتوں کا اہتمام کیا جائے گا، اس حوالے سے صوبائی صدر نثار کھوڑو آج سندھ سے سینیٹ امیدواروں اور ارکان اسمبلی کے اعزاز میں عشائیہ دیں گے، یکم مارچ کو صوبائی وزیر امتیاز شیخ کی جانب سے دعوت کا انعقاد کیا جائے گا، جب کہ 2 مارچ کو وزیراعلیٰ ہاؤس میں پیپلز پارٹی ارکانِ سندھ اسمبلی کو مدعو کیا گیا ہے
دوسری جانب سندھ اسمبلی کی دو پارلیمانی جماعتوں تحریک لبیک پاکستان اور ایم ایم اے کے چار ارکان سے بھی پیپلزپارٹی کی قیادت نے رابطہ کیا ہے، اور چاروں ارکان سے سینیٹ کی جنرل اور خواتین نشستوں پر ووٹ کی درخواست اور حمایت کی اپیل کی ہے.
