میٹا کمپنی نے اپنی زیرِ ملکیت سوشل ویب سائٹ فیسبک اور سوشل شیئرنگ ایپلیکیشن انسٹاگرام پر مختصر وڈیوز یعنی ریلز کے ذریعے آمدنی کے نئے اور آسان منصوبے کا اعلان کیا ہے
واضح رہے کہ میٹا کے مالک مارک زکربرگ نے ابتدائی طور پر جون 2022 میں فیسبک اور انسٹاگرام پر وڈیوز کے ذریعے پیسے کمانے کے منصوبے کو پیش کرنے کا اعلان کیا تھا، جسے اب مزید آسان بنا دیا گیا
میٹا کی جانب سے اپنی بلاگ پوسٹ میں بتایا گیا ہے کہ مختصر وڈیوز یعنی ریلز کے ذریعے آمدنی کے فیچر کو مزید بہتر بنا کر اب وڈیوز پر اشتہارات دکھانے کی مد میں کانٹینٹ کریئیٹرز کو پیسے دیے جائیں گے
بلاگ میں واضح کیا گیا ہے کہ کمپنی صارفین کی ریلز کی کارکردگی کی بنیاد پر ان کی وڈیوز پر اشتہارات چلائے گی اور ویوز کی بنیاد پر ہی کریئیٹرز کو پیسے فراہم کیے جائیں گے
کمپنی نے مواد تخلیق کاروں کو تجویز دی کہ وہ دوسری باتوں کو نظر انداز کرکے اپنی وڈیوز میں تخلیقی صلاحیتیں شامل کر کے انہیں بہتر بنائیں تاکہ انہیں زیادہ سے زیادہ اشتہارات دیے جا سکیں
مذکورہ پروگرام کے تحت نہ صرف فیسبک بلکہ انسٹاگرام ریلز پر بھی مواد تخلیق کاروں کو اشتہارات کی مد میں پیسے فراہم کیے جائیں گے
یعنی اب فیسبک اور انسٹاگرام پر بھی یوٹیوب کی طرح پیسے کمائے جا سکیں گے
میٹا کے مطابق مذکورہ پروگرام کے تحت جلد ہی پہلے انسٹاگرام پر آزمائشی پروگرام شروع کیا جائے گا، جس کے بعد فیسبک کو بھی آزمائش کا حصہ بنا کر کچھ وقت کے بعد پروگرام کو باضابطہ طور پر متعارف کرایا جائے گا
کمپنی کے مطابق پہلے مرحلے میں مذکورہ پروگرام دنیا بھر کے باون ملکوں میں پیش کیا جائے گا، جس میں متعدد ایشیائی ممالک بھی شامل ہیں
اس پروگرام کے پہلے ہی مرحلے میں بھارت کو شامل کر لیا گیا ہے لیکن حیران کن طور پر پاکستان فی الحال اس میں شامل نہیں ہے
اس فیچر کے تحت اٹھارہ سال سے زیادہ عمر کا ہر صارف وڈیوز کے ذریعے پیسے کما سکے گا، تاہم صارفین کو اپنے اکاؤنٹس کو پروفیشنل موڈ میں تبدیل کرنا ہوگا اور یہ فیچر فیسبک نے گزشتہ سال ہی پیش کر دیا تھا۔
