فیسبک نے رواں ماہ اپنی میسجنگ اپلیکشن واٹس ایپ میں ایک فیچر متعارف کرایا تھا، جس سے نئے پیغامات سات دن بعد خودبخود غائب ہو جاتے ہیں، اس فیچر کو فیسبک انتظامیہ نے "ڈس اپیئرنگ میسجز” کا نام دیا تھا، اب اسی طرح کا فیچر میسنجر کے لیے بھی متعارف کرادیا گیا ہے
لیکن میسنجر کے لیے متعارف کیا گیا "وینش موڈ” نامی یہ فیچر واٹس ایپ سے کچھ مختلف ہے کیونکہ اس میں پیغامات ایک بار دیکھے جانے اور چیٹ ونڈو بند کیے جانے پر ہی غائب ہو جائیں گے
فیسبک حکام کا کہنا ہے کہ اس فیچر کا مقصد قریبی دوستوں اور گھر والوں سے اس فکر کے بغیر رابطے میں رہنا ہے کہ وہ بات چیت برسوں تک موجود رہے گی. کمپنی کا ماننا ہے کہ یہ فیچر میمز، گفس، اسٹیکرز اور ری ایکشنز کے لیے بہترین ہے، جن کو آپ چیٹ ہسٹری میں دیکھنا نہیں چاہتے
صارف کو یہ اختیار حاصل ہوگا کہ وہ یہ فیچر ٹرن آن کرتا ہے یا نہیں، جس کے لیے کسی چیٹ تھریڈ کو سوائپ اپ کرنا ہوگا اور وینش موڈ کام کرنے لگے گا۔
سوائپ اپ دوبارہ کرنے پر معمول کی چیٹ واپس آجائے گی، تاہم یہ فیچر اسی وقت کام کرے گا جب چیٹ میں شامل دونوں افراد نے اسے ایکٹیو کیا ہوا ہو
اس موڈ کے دوران پرائیویسی کے لیے کئی فیچرز کا اضافہ کیا گیا ہے جیسے چیٹ میں اسکرین شاٹ لینے پر صارف کو بتایا جائے گا
اس سے قبل ستمبر میں فیس بک کی جانب سے انسٹاگرام کے ڈائریکٹ میسجز کو میسنجر سے منسلک کرنے کا آپشن پیش کیا گیا تھا۔ یہ نیا فیچر میسنجر اور انسٹاگرام میں بتدریج تمام صارفین کو دستیاب ہوگا۔ کمپنی کے مطابق فی الحال اسے امریکا اور چند دیگر ممالک میں میسنجر میں پیش کیا جارہا ہے اور جلد یورپی یونین میں پیش کیا جائے گا
انسٹاگرام میں یہ پہلے سے ہی متعدد ممالک میں دستیاب ہے، لیکن آنے والے ہفتوں میں امریکی صارفین بھی اسے استعمال کر سکیں گے.
