دنیائے کرکٹ کے کئی بڑے ٹورنامنٹس میں امپائر کی حیثیت سے پاکستان کی نمائندگی کرنے والے اسد رؤف لاہور کے لنڈا بازار میں کام کر رہے ہیں اور اس پر انہیں فخر ہے
ایک یوٹیوب چینل کو انٹرویو میں انہوں نے اپنے کیریئر، اسکینڈل اور موجودہ کام کے حوالے سے سوالوں کے جواب دیے
لنڈا بازار میں کام کرنے کے حوالے سے سوال پر اسد رؤف نے کہا ”یہ اپنا چھوٹا سا سیٹ اپ رکھا ہوا ہے، کیونکہ کام تو کرنا ہے اور میرے خون میں شامل ہے کہ جب تک زندگی ہے کام کرنا ہے“
انہوں نے کہا کہ میری عمر چھیاسٹھ سال ہوچکی ہے اور میں کام کر رہا ہوں اور کام کرتے رہنا چاہیے، یہ میرا کام ہے
انڈین پریمیئر لیگ (آئی پی ایل) میں امپائرنگ کے حوالے سے انہوں نے کہا کہ آئی پی ایل میں اپنا بہترین وقت گزارا، جو واقعات ہوئے اس کے علاوہ اچھا وقت گزارا، ان مسائل سے میرا لینا دینا کوئی نہیں تھا لیکن سارے فیصلے انہوں نے خود کیے
سابق امپائر کا کہنا تھا ”لڑکی والا معاملہ آیا تھا تو اس کے بعد بھی آئی پی ایل کے لیے بھارت گیا تھا، اگر میں نے کوئی غلط کام کیا ہوتا تو پولیس مجھے اسی وقت پکڑتی جبکہ اس لڑکی نے بعد میں مجھ سے معافی مانگی“
اسد رؤف نے کہا ”وہ ماڈل اور ایکسٹریس تھی، کسی سلیبریٹی کے ساتھ نام جوڑ کر اسٹوری ٹی وی یا اخبار کو بھیج کر پیسے لینا، بھارت میں ایسا ہوتا ہے، میں نے اس سے کہا تھا تمہیں کچھ فائدہ ہوا تو آپ کے لیے اچھا لیکن مجھے اس سے کوئی نقصان نہیں ہوا“
وضاحت کرتے ہوئے ان کا کہنا تھا کہ اس لڑکی کا بھارتی کرکٹ بورڈ (بی سی سی آئی) سے کوئی تعلق نہیں تھا، بھارت میں آف دی فیلڈ میرے سب کے ساتھ بہت اچھے تعلقات تھے کیونکہ میں مزاح پسند ہوں
اسد رؤف نے کہا ”بھارتی کھلاڑی اور یہاں تک کہ ان کی بیگمات بھی میری کمپنی کے لیے ہر وقت تیار رہتی تھیں اور کہتی تھیں کہ اسد بھائی آپ کی کمپنی میں محظوظ ہوتے ہیں“
ایک سوال پر انہوں نے کہا کہ مہندراسنگھ دھونی کی اہلیہ ساکشی ان میں سے ایک تھی، وہ مجھے اپنے بڑے بھائی کی طرح سمجھتی تھیں اور میرا احترام کرتی تھیں
انہوں نے کہا کہ ہربھجن کی بیگم گیتا بسرا بھی میری فین تھیں، یہ کرکٹ اور گراؤنڈ سے باہر کا معاملہ تھا اور ذاتی زندگی کے ذمرے میں آتا ہے
آئی پی ایل میں اسد رؤف کے ساتھ کیا معاملہ پیش آیا تھا؟
اسد رؤف کا نام انڈین پریمیئر لیگ (آئی پی ایل) 2013 کے بیٹنگ اسکینڈل میں ممبئی پولیس کی چارج شیٹ میں ‘مطلوب ملزمان’ کی فہرست میں شامل تھا، جہاں وہ آئی پی ایل کے دوران ہی ہندوستان چھوڑ کر چلے گئے تھے حالانکہ ممبئی پولیس ان سے ذاتی طور پر پوچھ گچھ کرنا چاہتی تھی
اس دوران ہندوستانی میڈیا نے اسد پر ماڈل اور ہندوستانی اداکارہ وندو دارا سنگھ سے روابط کا الزام عائد کیا تھا جنہیں بکیز، کھلاڑیوں اور آفیشلز کے درمیان رابطے کے لیے کردار ادا کرنے پر گرفتار کیا گیا تھا تاہم پاکستانی امپائر نے ان تمام الزامات کو مسترد کر دیا تھا
بی سی سی آئی کی ڈسپلنری کمیٹی نے اسد رؤف کو بورڈ کے اینٹی کرپشن کوڈ کی مختلف شقوں کے تحت کرپشن اور خراب رویے کا مرتکب قرار پایا تھا
اسد رؤف کمیٹی کے روبرو پیش نہیں ہوئے تھے تاہم تحریری طور پر تفصیلی جواب جمع کرایا تھا اور پابندی لگانے سے قبل تحقیقاتی کمشنر نے ان کے ان بیانات کا جائزہ لیا تھا
پاکستانی امپائر نے اپنے بیان میں مبینہ طور پر ان الزامات کو مسترد کرتے ہوئے ثبوت فراہم کرنے کا مطالبہ کیا تھا
مئی 2013 میں آئی پی ایل کے دوران ہی ہندوستان چھوڑنے کے بعد انہوں نے ایک پریس کانفرنس کے دوران بے قصور ہونے کا دعویٰ کرتے ہوئے کہا تھا ”میں کسی بھی قسم کی بدعنوانی میں ملوث نہیں ہوں“
وہ انگلینڈ میں منعقدہ چیمپیئنز ٹرافی میں اپنی ذمے داریوں سے دستبردار ہو گئے تھے، جس کے بعد انہیں آئی سی سی کے ایلیٹ پینل سے بھی نکال دیا گیا تاہم آئی سی سی نے واضح کیا تھا کہ انہیں کرپشن اسکینڈل کی بنیاد پر پینل سے نہیں نکالا گیا
بعد ازاں 2016ع میں بی سی سی آئی نے اسد رؤف پر کرپشن اور خراب رویے کے الزام میں پانچ سال کی پابندی عائد کر دی تھی
اسد رؤف نے 2000ع میں پاکستان اور سری لنکا کے درمیان میچ سے عالمی سطح پر امپائرنگ ڈیبیو کیا جبکہ 2006ع میں انہیں آئی سی سی ایلیٹ پینل کا حصہ بنایا گیا
وہ اب تک 49 ٹیسٹ، 98 ایک روزہ اور 23 ٹی ٹوئنٹی انٹرنیشنل میچوں میں امپائرنگ کا اعزاز رکھتے ہیں۔
