ٹیکنالوجی کے دیو مائیکرو سافٹ کمپنی نے اینڈرائڈ فون استعمال کرنے والے صارفین کو نئے وائرس سے خبردار کیا ہے
مائکرو سافٹ کا کہنا ہے کہ نیا وائرس اینڈرائڈ فون استعمال کرنے والوں کے لیے مشکلات کھڑی کرسکتا ہے، اس رینسوم ویئر کو ’’مال لاکر ڈاٹ ب‘‘ کا نام دیا گیا ہے
اسمارٹ فون میں ذاتی زندگی سے متعلق ایسی معلومات ہوتی ہیں جو کوئی نہیں چاہے گا کہ اِدھر اُدھر ہوجائیں۔ ذاتی کوائف، جائیداد و بینک اکاؤنٹس کی تفصیلات ان کے علاوہ ہیں جس کے باعث اسمارٹ فون ہمیشہ سے ہیکرز کا نشانہ بنتے رہے ہیں یا صارفین کسی وائرس کا شکار ہو کر اہم معلومات سے ہاتھ دھو بیٹھتے ہیں
مائیکروسافٹ نے اینڈرائڈ فون صارفین کو خبردار کیا ہے کہ ان کے اسمارٹ فونز میں خطرناک قسم کا وائرس MalLocker.B آن لائن فورمز اور ویب سائٹسں کے ذریعے منتقل ہو رہا ہے اور یہ وائرس زیادہ تر اینڈرائڈ ایپس کے اندر چھپا ہوتا ہے لہذا ایپس ڈاؤن لوڈ کرتے وقت محتاط رہیں
تفصیلات کے مطابق اگر یہ مالویئر کسی فون میں گھس آئے تو سب سے پہلے صارف کو فون کی اسکرین تک رسائی سے روکتا ہے، دیگر رینسم ویئر کے برعکس ’’مال لاکر ڈاٹ بی‘‘ فون کی زبان کو خفیہ نہیں کرتا، بلکہ صارف کو ایسا پیغام دکھاتا ہے جس میں دعویٰ کیا جاتا ہے کہ یہ پیغام قانون نافذ کرنے والے ادارے کی طرف سے ہے، پیغام میں اسکرین کو غیر مقفل /ان لاک کرنے کے لیے تاوان کا مطالبہ کیا جاتا ہے
صارف کی جانب سے ہوم یا کسی اور بٹن کو دبانے کی ہر کوشش کے باوجود اسکرین کام نہیں کرتی اور ’’ہیکرز‘‘ کی طرف سے اسکرین کھولنے کے عوض رقم کے مطالبے پر مبنی دھمکی آمیز پیغامات دکھائی دیتے ہیں۔ اس مالویئر کا کوڈ بہت آسان ہے اور یہ ایک سے زیادہ فون میں آسانی سے منتقل ہو سکتا ہے
مائیکرو سافٹ نے اینڈرائڈ فون صارفین کو ہدایت کی ہے کہ کسی بھی ایسی ایپ کو ڈاؤن لوڈ نہ کریں جس کا لنک واضح نہ ہو، سورس مشکوک ہو اور جو معروف بھی نہ ہو۔ ہمیشہ محفوظ قابل بھروسہ اور معروف ایپس ہی ڈاؤن لوڈ کریں، بصورتِ دیگر آپ کے فون کا کنٹرول، فون آپ کے ہاتھ میں ہونے کے باوجود اغوا ہو سکتا ہے اور آپ کو اسے بازیاب کرانے کے لیے تاوان بھی ادا کرنا پڑ سکتا ہے.
