ہندوستانی فلم انڈسٹری بالی ووڈ میں منشیات کے مبینہ استعمال کی تحقیقات کے دوران بھارت کی نارکوٹکس کنٹرول بیورو (این سی بی) نے معروف کامیڈین بھارتی سنگھ اور ان کے شوہر ہرش لمباچیا کو گرفتار کر لیا ہے
اس ضمن میں ملنے والی تفصیلات کے مطابق ایک منشیات فروش نے پوچھ گچھ کے دوران بھارتی سنگھ کا نام لیا تھا، جس پر نارکوٹکس کنٹرول بیورو (این سی بی) کی ٹیم نے کامیڈین بھارتی سنگھ کی رہائش گاہ اندھیری میں لوکھنڈوالا کمپلیکس میں چھاپہ مارا، جہاں تھوڑی سی مقدار میں منشیات برآمد بھی ہوئی
میڈیا رپورٹس کے مطابق اداکارہ بھارتی سنگھ کی رہائش گاہ سے منشیات ملنے کے بعد بھارت کے انسدادِ منشیات کے محکمے (این سی بی) نے انہیں اور ان کے شوہر ہرش لمباچیا کو گرفتار کر لیا، جن سے مزید پوچھ گچھ جاری ہے
یاد رہے کہ بالی ووڈ اداکار سشانت سنگھ رواں برس 14 جون کو اپنے کمرے میں مردہ حالت میں پائے گئے تھے، اُن کی پھندا لگی لاش ملنے کے باوجود اس معاملے میں قتل اور ممنوعہ منشیات کے استعمال پر بھی تفتیش کی جارہی ہے۔
اس حوالے سے کی جانے والی تحقیقات کے دوران بالی ووڈ میں منشیات کے استعمال اور خرید و فروخت کے بارے میں بھی شواہد ملے تھے، جس کے بعد بھارت میں انسدادِ منشیات کے محکمے نارکوٹکس کنٹرول بیورو (این سی بی) نے سشانت کی گرل فرینڈ ریا چکروتی کو اُن کے بھائی سمیت گرفتار کرلیا تھا
اس کے علاوہ کئی معروف اداکاروں کو تفتیش کے لیے طلب کیا جارہا ہے اور ان کے گھروں پر چھاپے بھی مارے جا رہے ہیں، صف اول کی اداکاراؤں دپیکا پڈوکون، سارہ خان اور شردھا کپور کے علاوہ دیگر فنکاروں کو بھی شامل تفتیش کیا گیا تھا.
