دنیا کی سب سے زیادہ استعمال کی جانے والی انسٹنٹ میسیجنگ ایپلیکیشن واٹس ایپ یوں تو کافی عرصے سے آن لائن خریداری کے فیچر متعارف کرانے کی جستجو میں تھی، تاہم اب بالآخر ایپلیکیشن نے آن لائن خریداری کا فیچر متعارف کرا دیا ہے
واٹس ایپ کی مالک کمپنی ’میٹا‘ کے بانی اور فیسبک سربراہ مارک زکربرگ نے اپنی ایک فیسبک پوسٹ میں تصدیق کرتے ہوئے بتایا کہ واٹس ایپ نے آن لائن خریداری کا آپشن متعارف کرا دیا ہے
مارک زکربرگ کے مطابق واٹس ایپ نے ابتدائی طور پر آن لائن خریداری کا آپشن صرف بھارت میں متعارف کرایا ہے، جہاں لوگ گھر بیٹھے واٹس ایپ پر آن لائن اسٹور ’جیو مارٹ‘ سے خریداری کر سکتے ہیں
انہوں نے بتایا ’جیو مارٹ‘ سے خریداری انتہائی آسان طریقے یعنی چیٹ باکس کے ذریعے کی جا سکے گی اور یہ آپشن فی الحال صرف بھارت میں ہی دستیاب ہے
ان کے مطابق خریدار اور اسٹور ملازمین کے درمیان ہونے والی چیٹ ’اینڈ ٹو اینڈ انکرپٹڈ‘ ہوگی، یعنی اس پر کسی تیسری پارٹی کو رسائی حاصل نہیں ہوگی
واضح رہے کہ’جیو مارٹ‘ بھارت کا سب سے بڑا ریٹیلر اسٹور ہے اور اس کمپنی کے انفارمیشن ٹیکنالوجی کے دیگر بھی کئی منصوبے ہیں، یہی کمپنی بھارت کی سب سے بڑی فون سروس کمپنی بھی ہے
واٹس ایپ کی جانب سے آن لائن خریداری کا مذکورہ آپشن پہلا آفیشل آپشن ہے، اس سے قبل اگرچہ چھوٹے موٹے کاروباری حضرات واٹس ایپ کے ذریعے آن لائن کاروبار کرتے ہیں مگر وہ آفیشل فیچر کے تحت نہیں ہوتا بلکہ وہ عام چیٹنگ فیچر کے تحت ہی ہوتا ہے
واٹس ایپ کی جانب سے بھارت میں پہلی بار آن لائن خریداری کے فیچر کو متعارف کرائے جانے کے بعد خیال کیا جا رہا ہے کہ کمپنی اگلے مرحلے میں مذکورہ فیچر کو دیگر ممالک میں بھی متعارف کرائے گی، تاہم کمپنی کی جانب سے تاحال اس بارے میں ابھی کچھ نہیں کہا گیا
اس فیچر کے تحت بزنس چیٹ کا ایک نیا آپشن متعارف کرایا گیا ہے، جس میں بھارت کے صرف ایک ہی اسٹور ’جیو مارٹ‘ کو رسائی دی گئی ہے اور بھارتی صارفین اپنے موبائل نمبر سے براہ راست مذکورہ چیٹ پر جا کر کوئی بھی چیز خرید سکتے ہیں اور واٹس ایپ چیٹ کے ذریعے ہی آن لائن پیمنٹ کرسکیں گے۔
