لندن : اس وقت ایک چھوٹی اور دلچسپ ایجاد کراؤڈ فنڈنگ کے مرحلے سے گزر رہی ہے۔ یہ ایجادمشروب پینے والا ایک مگ ہے، جس میں ایک بیٹری نصب ہے، جو اسے دستی ایئرکنڈیشنر بھی بناتی ہے
تفصیلات کے مطابق اسے اے سی مگ کا نام دیا گیا ہے جس میں کئی چینل سے ٹھنڈی ہوا باہر خارج ہوتی ہے اور آس پاس کے ماحول کی گرمی سات درجے سینٹی گریڈ تک کم کر سکتی ہے۔ اس کے اندر اسٹین لیس اسٹیل لگا ہے جو ہوا کو ٹھنڈا رکھتے ہوئے باہر پھینکنے میں مدد دیتا ہے
اس کا بٹن دبانے کے چند سیکنڈ بعد ہی اس سے ٹھنڈی ہوا خارج ہونے لگتی ہے، جو فوری طور پر ٹھنڈک کا احساس دلاتی ہے. ہوا پھینکنے کی جھری پندرہ درجے پر خمیدہ ہے، جو مقررہ جگہ پر ہوا ڈالتی ہے۔ اس لیے مگ کو ہاتھ میں لینے کی ضرورت نہیں بلکہ اسے میز پر رکھ کر چہرے کی جانب ہوا کا رخ کیا جا سکتا ہے
مگ سے خارج ہونے والی ہوا کی رفتار تین میٹر فی سیکنڈ ہے اور ہوا پھینکنے کے عمل کو تین طرح سے سیٹ کیا جا سکتا ہے۔ جب آپ اے سی مگ کے اندر برف کے ٹکڑے یا کیوبس رکھتے ہیں، تو فوری طور پر ٹھنڈی ہوا کا اخراج شروع ہوجاتا ہے
اگر آپ گرم مشروب کو کچھ ٹھنڈا کرنا چاہتے ہیں تو مگ یہ کام کرسکتا ہے اور اس میں نصف لیٹر سے زائد مشروب یعنی 600 ملی لیٹر بھرکر رکھا جاسکتا ہے
ورزش کرنے یا جاگنگ کرنے کے عمل میں یہ مگ ایک طرف آپ کی پیاس بجھاتا ہے، تو دوسری جانب آپ کو سرد ہوا بھی فراہم کرتا رہتا ہے۔
یہ اے سی مگ 2600 ایم اے ایچ بیٹری کی بدولت چالیس منٹ تک ہوا فراہم کرتا رہتا ہے۔ اسے کسی بھی پاور بینک یا چارجر سے چارج کیا جا سکتا ہے
دلچسپ بات یہ ہے کہ ان سب کے باوجود یہ مکمل طور پر واٹر پروف بھی ہے۔ ابھی یہ ابتدائی مراحل میں ہے جس کی تعارفی قیمت 70 ڈالر رکھی گئی ہے.
