پونے – پاکستانی فلم دی پینٹرسٹ نے پانچویں سالانہ بدھا انٹرنیشنل فلم فیسٹیول سے.”بہترین تجرباتی مختصر فلم“ کا ایوارڈ جیت لیا۔ فلمی میلہ کا انعقاد بھارتی شہر پونے میں ہوا
واضح رہے کہ یہ فیسٹیول گوتم بدھ کی تعلیمات کے حوالے سے منعقد کیا جاتا ہے
فلم میں اداکار عدنان بشیر خان، کائنات منیر اور علیزہ جاوید شامل ہیں
دی پینٹرسٹ کی کہانی ایک مفلوک الحال فنکار کی زبانی ہے، جس کی پینٹنگز کو آرٹ گیلری کی ایک کیوریٹر مختلف ناموں سے فروخت کرتی ہے
یہ مختصر فلم ایک فنکار سے کریڈٹ چوری کی تلخ حقیقت سے متعلق ایک بےدردانہ انکشاف ہے
فلم دی پینٹرسٹ کی کہانی زاہد رائے نے لکھی ہے، جبکہ سے خالد حسن خان نے ڈائریکٹ کیا ہے
پینٹرسٹ ایک مختصر تجرباتی فلم ہے، جو آج کی دنیا میں ایک بد نما حقیقت کو منظر عام پر لاتی ہے، جہاں کسی مصنف، فنکار یا تخلیق کار کو اس کی دانشورانہ ملکیت اور معاوضے یا دونوں سے محروم کرنے والے ادبی اور فنی رہزن موجود ہیں
افسانوی اور خود سوانحی کہانی کا امتزاج ”دی پینٹرسٹ“ ایک فنکار، شاہد کے بارے میں ہے، جو نامعلوم مصور ہونے کے ناطے، اپنے فن پاروں کو مٹھی بھر رقم کے عوض ایک خاتون، تانیا کو فروخت کرتا رہا ہے۔ لیکن ایک دن اس پہ انکشاف ہوتا ہے کہ وہ اب تک اپنی روح بیچ رہا تھا! فن و مصورانہ قزاقی اس فلم کا خیالیہ ہے
”دی پینٹرسٹ“ ان تخلیق کاروں کے فنکارانہ جذبے کو تسلیم کرتا ہے اوران کی تخیلی حوصلے کی تعریف کرتا ہے، جو ایسے مفاد پرست فنی ہائی جیکرز کا شکار ہوتے آرہے ہیں اور اب تک گمنامی کی زندگی بسر کر نے پر مجبور ہیں، لیکن ان کا فنکارانہ جذبہ قابل تعریف ہے
فلم کے ہدایتکار خالد حسن خان کا کہنا ہے کہ بدھا انٹرنیشنل فلم فیسٹیول کا ایوارڈ پاکستانی قوم کے لیے ایک اعزاز ہے۔ ہمارا ملک ہزاروں سال پرانے بدھ فن اور ثقافت کا گہوارہ ہے۔ پشاور، سوات اور ٹیکسلا میں گندھارا تہذیب کے قدیم آثار ہماری شاندار ثقافتی میراث کا حصہ ہیں.
