اس وقت کرکٹ کے شائقین کی نظریں انڈیا میں ہونے والے ورلڈکپ پر مرکوز ہیں، لیکن دوسری جانب ایک ایسا کرکٹ میچ بھی منعقد ہوا، جو کئی اعتبار سے بلکل انوکھا تھا
یوں تو کرکٹ میں نئے نئے ریکارڈز بنتے اور ٹوٹتے رہتے ہیں، تاہم حالیہ دنوں میں ایک ایسا میچ بھی ہوا جو اپنی نوعیت میں ایک منفرد میچ مقابلہ ثابت ہوا ہے
یہ ٹی20 میچ چلی اور ارجنٹائن کی خواتین ٹیموں کے درمیان بیونس آئرس میں کھیلا گیا، جس میں ارجنٹائن نے پہلے بیٹنگ کرتے ہوئے مقررہ بیس اوورز میں صرف ایک وکٹ کے نقصان پر 427 رنز بنا ڈالے
اس کے جواب میں چلی کی ویمنز ٹیم 15 اوورز میں صرف 65 کے اسکور پر ہی ڈھیر ہو گئی اور یوں یہ میچ ارجنٹائن نے 364 رنز سے جیت لیا
اس میچ میں ارجنٹائن کی بیٹر لُوسیا ٹیلر نے 27 چوکے رسید کرتے ہوئے 84 گیندوں پر 169 رنز بنائے جبکہ اُن کی ساتھی البرٹینا گلان 23 چوکے لگا کر 84 گیندوں پر 145 رنز بنانے میں کامیاب ہوئیں
ارجنٹائن کی واحد وکٹ 350 کے اسکور پر گری، جبکہ لُوسیا اور البرٹینا کی یہ 350 رنز کی پارٹنرشپ ٹی20 کرکٹ کی تاریخ کی سب سے بڑی پارنٹرشپ بن گئی
چلی کی جانب سے واحد وکٹ جیسیکا مرانڈا نے لی، جنہوں نے چار اوورز میں 64 رنز دیے
لیکن دلچسپ اور حیران کن بات یہ ہے کہ 427 رنز کے ٹوٹل میں ارجنٹائن کی بیٹرز نے کوئی ایک بھی بھی چھکا نہیں لگایا
ابھی تو رکیے۔۔ سب سے مزے کی بات تو ابھی باقی ہے۔۔ وہ یہ کہ اس منفرد میچ میں چلی کی بولروں کی جانب سے 73 ایکسٹرا رنز دیے گئے جس میں 64 نو بالز شامل تھیں!
اسی طرح بولنگ کرتے ہوئے چلی کی بولر کونسٹنزا اویارس نے چار اوورز میں بغیر کوئی وکٹ لیے 92 رنز دیے، جو کے ایک اور نیا ریکارڈ ہے
427 رنز کے ہدف کے جواب میں ارجنٹائن کی بولروں نے بھی 29 ایکسٹرا رنز دیے، جس میں 26 وائڈ بالز شامل تھیں جبکہ چلی کی سات بیٹرز صفر کے اسکور پر آؤٹ ہوئیں
خیال رہے ارجنٹائن کا چلی کے خلاف 427 رنز کا اسکور ویمنز ٹی20 کرکٹ میں ایک اننگز میں سب سے زیادہ سکور ہے۔ اس سے قبل یہ ریکارڈ بحرین ویمنز ٹیم کے پاس تھا، جنہوں نے سعودی عرب کے خلاف ٹی20 میچ میں 318 رنز بنائے تھے۔
