منیلا : فلپائن کے صدر روڈریگو دوتیرتے نے کہا ہے کہ جو فلپائنی ویکسین نہیں لگوائے گا، وہ جیل جانے کے لیے تیار رہے
تفصیلات کے مطابق عالمی خبر رساں ادارے کی ایک رپورٹ میں بتایا گیا ہے کہ فلپائن میں کورونا وبا کی بگڑتی ہوئی صورت حال اور عوام کی جانب سے ویکسین لگوانے میں ہچکچاہٹ اور مزاحمت دکھانے پر صدر روڈریگو دوتیرتے نے اعلان کرتے ہوئے فلپائن کے شہریوں سے کہا ہے کہ آپ کے پاس صرف دو ہی راستے ہیں، یا تو ویکسین لگوائیں یا پھر جیل جائیں
فلپائن کے صدر کا کہنا ہے کہ ویکسین لگوانے سے انکار کرنے والے بے وقوفوں کی وجہ سے انہیں شدید غصہ ہے۔ ان سب ضدیوں نے اگر اب بھی ویکسین لگوانے سے انکار کیا تو سور کو بے ہوش کرنے والے شاٹس سے ان لوگوں کو بے ہوش کرکے ویکسین لگواؤں گا
اطلاعات کے مطابق صدر روڈریگو دوتیرتے کے اس غصے کی وجہ ملک میں بھارت سے آنے والے کورونا وائرس کی نئی قسم ڈیلٹا وائرس کا تیزی سے پھیلنا ہے، جس سے اموات میں بھی اضافہ ہوا ہے اور اسپتالوں میں مریضوں کے لیے جگہ باقی نہیں بچی ہے
واضح رہے کہ اس سے قبل بھی فلپائن کے صدر کورونا ایس او پیز کی خلاف ورزی کرنے والوں کو گولی مارنے کی دھمکی دے چکے ہیں، جس کے بعد سیکیورٹی حکام کی جانب سے تین افراد پر گولی چلانے کا واقعہ بھی پیش آیا تھا جو شدید زخمی ہوگئے تھے اور ان میں سے ایک عمر بھر کے لیے معذور ہو گیا تھا
یہ جاننا دلچسپی سے خالی نہ ہوگا کہ فلپائن میں ویکسینیشن کا آغاز رواں برس مارچ سے ہوچکا ہے لیکن اب تک صرف ایک فیصد عوام نے ہی ویکسین لگوائی ہے جس کی وجہ حکومت پر اعتماد نہ ہونے، سازشی نظریات اور ویکسینیشن کے بارے میں خوف ہے۔
