کیا گوگل کی جانب سے لاکھوں اکاؤنٹس ڈیلیٹ کرنے سے آپ کا اکاؤنٹ بھی متاثر ہو سکتا ہے؟
گوگل نے دسمبر میں لاکھوں ’جی میل‘ اکاؤنٹس ڈیلیٹ کرنے کا فیصلہ کیا ہے۔ اس حوالے سے این ڈی ٹی وی کی ایک رپورٹ میں بتایا گیا ہے کہ گوگل کی جانب سے دسمبر میں لاکھوں ایسے جی میل اکاؤنٹس ڈیلیٹ کر دیے جائیں گے، جنہیں دو سال سے استعمال نہیں کیا گیا
گوگل پروڈکٹ منیجمنٹ کی نائب صدر رُتھ کریچلی کا کہنا ہے ”کمپنی کے صارفین کے اکاؤنٹس کو درپیش خطرے کو کم کرنے کے لیے غیر استعمال شدہ اکاؤنٹس کو ڈیلیٹ کرنے کا اقدام اٹھایا جا رہا ہے“
گوگل کی نائب صدر نے اکاؤنٹس ڈیلیٹ کرنے کی پالیسی کے حوالے سے مزید بتایا ”گوگل کے غیر فعال اکاؤنٹس کے ساتھ ان پر موجود مواد بھی ڈیلیٹ کر دیا جائے گا“
انہوں نے کہا ”جن اکاؤنٹس پر دو سال سے ’سائن اِن‘ نہیں کیا گیا، انہیں ڈیلیٹ کرنے کے ساتھ جی میل، ڈرائیو، کلینڈر اور فوٹوز بھی ڈیلیٹ کر دی جائیں گی“
رُتھ کریچلی نے اکاؤنٹس ڈیلیٹ کرنے کی وجوہات بیان کرتے ہوئے کہا ”گوگل کے وہ غیر فعال اکاؤنٹس اکثر پرانے یا دوبارہ استعمال شدہ پاس ورڈز پر انحصار کرتے ہیں، ان پر ٹو وے اتھینٹیکیشن بھی نہیں ہوتی اور انہیں بآسانی ہیک کیا جا سکتا ہے“
”ایک سروے کے مطابق غیر فعال اکاؤنٹس کی نسبت فعال اکاؤنٹس پر دس گنا زیادہ ٹو وے ویریفیکیشن موجود ہے“
گوگل کی پروڈکٹ مینجمنٹ کی نائب صدر کی جانب سے جاری بیان کے مطابق ”دوہری ویریفیکیشن کے بغیر اکاؤنٹس کو بآسانی نقصان پہنچایا جا سکتا ہے اور کسی کی بھی شناخت چھِن سکتی ہے“
گوگل پہلے ان اکاؤنٹس کو ڈیلیٹ کرے گا، جنہیں دو سال سے استعمال نہیں کیا گیا۔ تاہم آرگنائزیشنز جیسے کہ اسکول اور بزنس کے لیے استعمال کیے جانے والے اکاؤنٹس کو ڈیلیٹ نہیں کیا جائے گا
گوگل کے مطابق، ایسے اکاؤنٹس، جنہیں دو سال میں کم از کم ایک بار سائن اِن کیا گیا ہے، وہ فعال اکاؤنٹس میں شمار ہوں گے اور انہیں ڈیلیٹ بھی نہیں کیا جائے گا
جن گوگل اکاؤنٹس پر کوئی ای میل بھیجی یا پڑھی گئی، گوگل ڈرائیو استعمال کی گئی یا وڈیو اسٹریمنگ پلیٹ فارم یوٹیوب پر وڈیو دیکھی گئی، وہ بھی ایکٹو اکاؤنٹس تصور کیے جائیں گے
اس کے علاوہ وہ اکاؤنٹس جن سے گوگل پلے اسٹور سے کوئی ایپلیکیشن ڈاؤنلوڈ یا گوگل سرچ انجن میں کچھ سرچ کیا گیا ہو، وہ بھی ایکٹو یعنی فعال اکاؤںٹس میں شمار ہوں گے۔ یعنی ایسی صورت میں ان اکاؤنٹس کو ڈلیٹ نہیں کیا جائے گا۔
