کراچی : وفاقی بجٹ میں گاڑیوں کی قیمتوں میں کمی کے لیے فیڈرل ایکسائز ڈیوٹی اور سیلز ٹیکس میں کمی کا اطلاق ہوگیا ہے، جس کے بعد گاڑیوں کی قیمتوں میں 48 ہزار سے 2 لاکھ 24 ہزار روپے تک کی کمی واقع ہوگی
گاڑیاں بنانے والی کمپنیاں ٹیکس میں کمی کے لحاظ سے نئی قیمتوں کا نوٹیفکیشن جلد جاری کریں گی
وفاقی حکومت نے 660 سی سی سے 1000 سی سی تک کی گاڑیوں پر سیلز ٹیکس کی شرح 17 فیصد سے کم کر کے 12.5 فیصد مقرر کردی جبکہ ایک ہزار سی سی تک کی گاڑیوں پر عائد 2.5 فیصد فیڈرل ایکسائز ڈیوٹی بھی ختم کردی گئی جس سے 660 سی سی سے 1000 سی سی تک کی گاڑیوں کی قیمت میں 88 ہزار سے ایک لاکھ 21 ہزار روپے تک کی کمی واقع ہوگی
وفاقی حکومت نے ایک ہزار سی سی سے زائد اور 2000 سی سی تک کی گاڑیوں پر فیڈرل ایکسائز ڈیوٹی کی شرح 5 فیصد سے کم کرکے 2.5 فیصد کردی تاہم اس کٹیگری کی گاڑیوں پر سیلز ٹیکس کی شرح 17 فیصد برقرار رکھی گئی، ایک ہزار سی سی سے زائد اور 2000 سی سی تک کی گاڑیوں کی قیمت میں 48 ہزار سے ایک لاکھ 28 ہزار روپے تک کی کمی ہوگی
جب کہ 2000 سی سی سے زائد اور 3000 سی سی اور اس سے زائد گاڑیوں پر ود ہولڈنگ ٹیکس کی شرح 7.5 فیصد سے کم کرکے 2.5 فیصد کردی گئی جس سے اس کٹیگری کی گاڑیوں کی قیمت ایک لاکھ 60 ہزار سے 2 لاکھ 24 ہزار روپے تک کی کمی ہوگی
عالمی اور مقامی مارکیٹ میں خام مال کی قیمتوں میں اضافہ کی وجہ سے گاڑیوں کی قیمت میں بھی مسلسل اضافہ ہورہا تھا جس سے آٹو انڈسٹری کی ترقی کی شرح نمو متاثر ہونے کا خدشہ تھا۔ گاڑیوں پر حکومتی محصولات کی شرح 30فیصد کے لگ بھگ تھی جس میں اب فیڈرل ایکسائز ڈیوٹی کم کرنے سی کمی آئے گی.
