بالی وڈ کی معروف اور اپنے متنازع بیانات کے باعث ہمیشہ تنازعات میں گھری رہنے والی اداکارہ کنگنا رناوت آج کل تنقید کی بجائے اپنی نئی فلم ’ایمرجنسی‘ کی وجہ سے تعریف کی ’زد‘ میں ہیں
حال ہی میں فلم کا ٹیزر جاری کیا گیا ہے، جس میں وہ بھغ کی واحد خاتون وزیراعظم اندرا گاندھی کا کردار ادا کر رہی ہیں
نہ صرف شائقین بلکہ بالی وڈ انڈسٹری سے بھی اداکاروں اور فلم سازوں نے کنگنا رناوت کو سراہتے ہوئے ان کے لیے تعریفی کلمات کہے
معروف بھارتی ہدایت کار رام گوپال ورما نے کچھ الگ ہی انداز میں تعریف کی۔ انہوں نے اندرا گاندھی کا ایک پرانا انٹرویو ٹوئٹر پر شیئر کیا اور ساتھ لکھا ”یقین کریں یا نہ کریں، اندرا گاندھی کنگنا رناوت کی طرح ایکٹ کر رہی ہیں“
یہ انٹرویو اندرا گاندھی نے سال 1984ع میں دیا تھا، جس میں وہ آئندہ انتخابات اور دیگر سیاسی معاملات پر بات کر رہی ہیں
کنگنا رناوت نے اپنے انسٹاگرام اکاؤنٹ پر رام گوپال ورما کی ٹویٹ کا اسکرین شاٹ شیئر کرتے ہوئے خوشی کا اظہار کیا کہ اس تبصرے سے ان کی حوصلہ افزائی ہوئی ہے کیونکہ وہ خود اندرا گاندھی کا کردار نبھانے جا رہی ہیں
فلم میں اندرا گاندھی کے حریف سیاستدان جے پی نارائن کا کردار معروف اداکار انوپم کھیر ادا کر رہے ہیں۔کنگنا رناوت نے چند روز قبل فلم کا ٹیزر شیئر کرتے ہوئے لکھا تھا کہ ’انہیں پیش کر رہی ہوں جنہیں سر کہہ کر پکارا جاتا تھا‘
فلم ایمرجنسی کی لکھاری اور ڈائریکٹر بھی کنگنا رناوت ہی ہیں، جبکہ اس کے ڈائیلاگ رتیش شاہ نے لکھے ہیں
کنگنا نوازالدین صدیقی کی ’ٹِکو ویڈز شیرو‘ کو بھی پروڈیوس کر رہی ہیں، جو ایمیزون پرائم پر ڈجیٹل ریلیز کے لیے تیار ہے اور اس میں اونیت کور بھی ہیں۔
