کیلیفورنیا – یوٹیوب نے اپنے پلیٹ فارم میں ”گمراہ کن اور نقصان دہ مواد” کی روک تھام کے لیے نئے اقدامات پر غور شروع کردیا ہے
کمپنی کی جانب جن تبدیلیوں اور اپ ڈیٹس پر غور کیا جارہا ہے ان میں سے ایک ‘بریک’ شیئرنگ فیچر بھی ہے، جو غیر یقینی مواد پر مبنی وڈیوز کے لیے ہوگا
سوشل میڈیا ماہرین کے مطابق اگر اس پر عمل درآمد کیا جاتا ہے تو یہ اس پلیٹ فارم میں ایک بہت بڑی بنیادی تبدیلی ہوگی
یوٹیوب کے چیف پراڈکٹ آفیسر نیل موہن نے بتایا کہ کمپنی کی جانب سے گمراہ کن مواد کو وائرل ہونے سے روکنے کے لیے ہر ممکن اقدامات کیے جائیں گے
انہوں نے کہا کہ غیریقینی مواد والی وڈیوز ہماری پالیسیوں کے تحت ڈیلیٹ نہیں کی جا سکتیں، لیکن ضروری نہیں کہ ہم لوگوں کو ایسی وڈیوز ریکمینڈ کریں، مگر یہ بھی کسی چیلنج سے کم نہیں
اس کی وجہ یہ ہے کہ اگر یوٹیوب ایسی وڈیوز کو ریکمینڈ نہ بھی کرے، تو بھی وہ دیگر پلیٹ فارمز میں وائرل ہوسکتی ہیں
تو اسی کو مدنظر رکھتے ہوئے کمپنی کی جانب سے اس طرح کی وڈیوز کے یے شیئر بٹن کو ڈس ایبل کرنے یا وڈیو کے لنک کو بریک کرنے پر غور کیا جارہا ہے
ایسا کرنے پر صارفین ان وڈیوز کو کسی اور سائٹ پر ایمبیڈ یا لنک نہیں کرسکیں گے
اگر یوٹیوب کی جانب سے کچھ وڈیوز کو شیئر کرنے سے روکا جاتا ہے، تو یہ پلیٹ فارم کے لیے ڈرامائی قدم ہوگا، جس کا دعویٰ ہے کہ اس طرح کا ایک فیصد سے بھی کم مواد ریکمینڈ کیا جاتا ہے
اس کے علاوہ کمپنی کی جانب سے یہ بھی بتایا گیا کہ دیگر تبدیلیوں میں سرچ رزلٹس میں اضافی اقسام کے لیبلز پر بھی غور کیا جارہا ہے.
