ملازمت نہ ملنے پر لُنڈے کا کاروبار کرنے والا پی ایچ ڈی ڈاکٹر، جو اپنے کام سے خوش ہے۔۔

خیبر پختونخوا کے ضلع باجوڑ سے تعلق رکھنے والے مسیح اللہ نے اسلامیات میں پی ایچ ڈی کر رکھی ہے۔ مسیح اللہ نے نوکری کرنے کے بجائے پرانے کپڑوں اور دوسری اشیا کا اسٹال لگا کر روزی کمانے کو ترجیح دی

وہ صوبے کے مختلف اضلاع میں مختلف دنوں پر لگنے والے بازاروں میں استعمال شدہ اشیا بیچتے ہیں اور رزقِ حلال کماتے ہیں

مسیح اللہ کہتے ہیں ”تعلیم کا مقصد پیسہ کمانا ہے نہ پیسے کے لیے تعلیم حاصل کی جاتی ہے۔ نوکری نہیں ملی تو یہ کاروبار شروع کیا اور اب بہت کماتا ہوں اور خوش بھی ہوں“

مسیح اللہ نے 2012ع میں خیبر پختونخوا کی باچا خان یونیورسٹی سے گریجویشن کی اور بعد ازاں اسی تعلیمی ادارے سے ماسٹرز کی ڈگری حاصل کی

انہوں نے ماسٹرز ڈگری کے بعد ایم فل کیا، اور بعد میں اسلام آباد کی انٹرنیشنل اسلامک یونیورسٹی سے اسلامیات کے مضمون میں پی ایچ ڈی کر کے ڈاکٹریٹ مکمل کی۔ پی ایچ ڈی کے لیے ان کے مقالے کا موضوع ’اخلاقیات و معاملات‘ تھا

ڈاکٹریٹ کی ڈگری حاصل کرنے کے بعد مسیح اللہ نے کچھ عرصہ نجی تعلیمی اداروں میں پڑھایا بھی۔۔ اپنی ملازمت اور کاروبار کا موازنہ کرتے ہوئے وہ کہتے ہیں ”ان نوکریوں میں اتنا پیسہ نہیں تھا، جتنا میں اس کاروبار میں کماتا ہوں“

ان کا کہنا ہے ”تعلیم کا مقصد اگر پیسہ کمانا ہے، تو پیسہ کاروبار میں زیادہ ہے اور میں خوب کماتا ہوں“

مسیح اللہ کہتے ہیں ”بھارت کے امیر ترین شخص مکیش امبانی کا قول ہے کہ دنیا میں سینکڑوں کروڑ پتی افراد میں سے کوئی بھی تعلیم یافتہ نہیں ہے، لیکن وہ دنیا میں کامیاب ترین لوگوں میں شامل ہیں“

مسیح اللہ نے دینی تعلیم میں مفتی کا کورس بھی مکمل کیا ہوا ہے، جبکہ ہیلتھ ٹیکنیشن کا ڈپلومہ بھی رکھتے ہیں۔ لیکن اس سب کے باوجود وہ کہتے ہیں ”میں اس لنڈے کے کاروبار سے خوش ہوں۔“

مسیح اللہ سوشل میڈیا پر اپنی ایک وڈیو پر آنے والے کمنٹس کے متعلق ناخوش تھے۔ ”زیادہ لوگوں کے کمنٹس یہی تھے کہ ’پی ایچ ڈی کی ہے، اور لنڈے کا اسٹال لگائے بیٹھا ہے۔‘ میں ان لوگوں کو کہنا چاہتا ہوں کہ یہ میرا اپنا کاروبار ہے اور ایک عام نوکری کرنے سے بہتر ہے، میں خود اپنی مرضی سے کاروبار کر کے پیسہ کماؤں۔“