نیویارک : معروف امریکی صنعتکار ایلون مسک کا کہنا ہے کہ ان کی کمپنی اسپیس ایکس کی جانب سے تیار کردہ راکٹ اگلے سال کے اوائل میں چاند کے مدار کا چکر لگانے کی کوشش کرے گا
تفصیلات کے مطابق امریکا کی نیشنل اکیڈمیز اسپیس اسٹڈی بورڈ کے اجلاس کے موقع پر ایلون مسک کا کہنا تھا کہ دسمبر میں کچھ ٹیسٹ مکمل کرنے کے بعد حتمی فلائٹ جنوری میں لانچ کی جائے گی
ایلون مسک نے کہا کہ پہلی فلائٹ میں بہت سے خطرات درپیش ہوں گے، جن کی وجہ سے اگرچہ کامیابی کے امکانات کم ہیں، لیکن مجھے امید ہے کہ ہمیں چاند پر انسان کی دوبارہ واپسی کے مشن میں خاطر خواہ کامیابی دیکھنے کو ملے گی
واضح رہے کہ اسپیس ایکس کے راکٹ اسٹار شپ نے اس سے قبل زمین کے مدار میں متعدد چکر کامیابی سے لگائے ہیں۔ کئی ناکام کوششوں کے بعد اسپیس ایکس کی تکنیکی ٹیم نے کامیابی کے ساتھ اسٹار شپ کو مشن کی تکمیل کے بعد دوبارہ واپس اتار لیا تھا
امریکی صنعتکار نے کہا کہ رواں سال کے آخر تک امریکی انتظامیہ سے خلائی مشن کی اجازت لے لی جائے گی
ایلون مسک کے مطابق کامیاب پرواز کی صورت میں جنوری 2022 کے دوران ایک درجن یا اس سے زائد خلائی مشن مکمل کئے جائیں گے
امریکی اسپیس ایجنسی ناسا نے اپنے آرٹیمس پروگرام کے تحت اسپیس ایکس کے اسٹار شپ راکٹ کو منتخب کیا ہے، تاکہ 2025ع تک انسان کی چاند پر واپسی کو ممکن بنایا جا سکے
جبکہ ایلون مسک کے خیال کے مطابق وہ دنیا کا سب سے بڑا راکٹ تیار کریں گے جو کہیں زیادہ تعداد میں لوگوں کو نظام شمسی کے کسی بھی مقام تک لے جانے کی صلاحیت کا حامل ہوگا
انہوں نے کہا ”زمین سے انسانوں کی ہجرت اور دوسرے سیاروں پر رہائش کو یقینی بنانے کے لئے میرے خیال میں ہمیں ایک ہزار بڑے راکٹوں کا استعمال کرنا پڑے گا“
