سان سلواڈور : وقت کے ساتھ ساتھ دنیا کے کئی ممالک میں بٹ کوائن کی سرمایہ کاری اور استعمال ہونے لگا ہے، مگر وسطی امریکا میں ایک ایسا ملک بھی ہے، جہاں باقاعدہ طور پر بٹ کوائن پر مبنی ایک پورا شہر بنانے کا منصوبہ ہے
بٹ کوائن سٹی نامی یہ شہر ایل سلواڈور میں بنایا جا رہا ہے. یہ شہر کوائن کی طرح ایک دائرے کی شکل میں ہوگا اور یہاں کسی قسم کا کوئی بھی انکم، پراپرٹی یا پے رول ٹیکس لاگو نہیں ہوگا
اس حوالے سے ایل سلواڈور کے صدر نائب بوکیلے کا کہنا ہے کہ اس شہر میں رہائشی اور کاروباری علاقے، ریستوران، ایئرپورٹ، بندرگاہ اور ریل سروس کی سہولیات ہونگی
خبر رساں ادارے روئٹرز کے مطابق ہفتے کے روز بٹ کوائن کو فروغ دینے کی تقریب کے اختتام پر شرکا سے خطاب کرتے ہوئے صدر بوکیلے کا کہنا تھا کہ بٹ کوائن سٹی کو توانائی ایک آتش فشاں سے فراہم کی جائے گی
کوائن ڈیسک نامی کاروباری ویب سائٹ نے صدر کا حوالہ دیتے ہوئے بتایا کہ یہ شہر خلیج فونسیکا کے ساتھ ایک آتش فشاں کے قریب قائم کیا جائے گا
حکومت کا ارادہ ہے کہ آتش فشاں کے قریب ایک پاور پلانٹ لگایا جائے گا، جس سے شہر اور بٹ کوائن مائننگ کے لیے توانائی فراہم کی جائے گی
صدر کا مزید کہنا تھا کہ ایل سلواڈور کی حکومت کا ارادہ ہے کہ وہ ایک ارب امریکی ڈالر کا ’بٹ کوائن بونڈ‘ جاری کرے گی، جس میں سے پچاس کروڑ ڈالر شہر کے لیے مطلوب توانائی اور مائننگ کے انفراسٹرکچر کے لیے استعمال کیے جائیں گے، جبکہ باقی کے پچاس کروڑ ڈالر مزید بٹ کوائن خریدنے میں استعمال ہوں گے.
