لندن – برطانیہ کے شہر کووینٹری میں ایک پاکستانی نژاد خاندان میں والدین کے ساتھ ساتھ ان کے چھ بچے بھی سورج مکھی (البینزم) ہیں
اس حوالے سے دلچسپ بات یہ ہے کہ یہ سورج مکھی بہن بھائیوں کی سب سے زیادہ تعداد کا عالمی رکارڈ بھی ہے
گنیز ورلڈ ریکارڈ کے مطابق، پاکستان میں پیدا ہونے والے اسلم پرویز اور شمیم اختر، دونوں ہی سورج مکھی ہیں، جو برسوں پہلے برطانیہ منتقل ہوگئے تھے
یہاں ان کے چھ بچے یعنی نسیم اختر، غلام علی، حیدر علی، مقدس بی بی، مسرت بیگم اور محمد رفیع بھی سورج مکھی ہی پیدا ہوئے
واضح رہے کہ سورج مکھی یا ’البینزم‘ ایک موروثی کیفیت ہے جس میں کھال، بالوں اور آنکھ کی پتلی کو مخصوص رنگ دینے والا قدرتی مادّہ ’میلانین‘ متاثر ہوتا ہے
جس کہ نتیجہ یہ نکلتا ہے کہ متاثرہ فرد کا چہرہ اور بال پیدائشی طور پر انتہائی سفید دکھائی دینے لگتے ہیں، جبکہ آنکھوں کی رنگت بھی خاصی مختلف ہوجاتی ہے
اس خاندان کے حوالے سے تکلیف دہ امر یہ ہے کہ ان تمام بہن بھائیوں کو بچپن ہی سے اپنے سورج مکھی ہونے کی وجہ سے مذاق کا نشانہ بنایا جاتا تھا، یہی وجہ ہے کہ انہوں نے زیادہ دوست بھی نہیں بنائے
تاہم وقت گزرنے اور بڑے ہونے کے بعد انہیں احساس ہوا کہ اس صورت حال کا شکار صرف وہی نہیں ہیں، بلکہ لاکھوں دوسرے لوگ بھی ایسے ہی حالات سے گزر رہے ہیں
یہی وہ وقت تھا، جب انہوں نے اپنے شہر میں البینزم سے آگاہی دینے والی تنظیموں میں بطور رضاکار کام کرنا شروع کر دیا
کچھ عرصہ پہلے ان میں سب سے بڑی بہن نسیم اختر کو خیال آیا کہ کیوں نہ اپنے عجیب و غریب خاندان کےلیے گنیز ورلڈ رکارڈ میں درخواست دی جائے
نسیم اختر نے اپنے اس خیال کو عملی جامہ پہنایا اور خوش قسمتی سے جلد ہی انہیں جواب بھی موصول ہوگیا اور وہ بھی ایک اچھی خبر کے ساتھ
جی ہاں، ان کی درخواست پر گنیز ورلڈ ریکارڈ کے نمائندوں نے بھی تصدیق کردی کہ وہ سورج مکھی بہن بھائیوں کی سب سے بڑی تعداد والا خاندان ہیں
آج یہ تمام بہن بھائی شادی شدہ ہیں، لیکن خوشقسمتی سے ان کے بچوں میں سے کوئی بھی سورج مکھی نہیں.
