یوں تو سگریٹ نوشی ایک جان لیوا عادت ہے اور اس کے نقصانات کے متعلق دنیا بھر میں آگاہی مہمات چلائی جاتی ہیں، لیکن افریقی ملک کیمرون میں ایک ایسا واقعہ پیش آیا جس میں سگریٹ نوشی کی عادت ایک شخص کی جان بچانے کی وجہ بن گئی
خبر رساں ادارے روئٹرز کے مطابق کیمرون کے دارالحکومت یاونڈے میں ایک جشن کی تقریب میں شریک افراد پر مٹی کا تودہ گرنے سے پندرہ افراد ہلاک ہو گئے، لیکن اس واقعے سے چند لمحے قبل مکولو ڈوس نامی ایک شخص سگریٹ پینے کے لیے اپنی جگہ سے اٹھ گیا تھا
زندہ بچ جانے والے مکولو ڈوس نے روئٹرز کو بتایا ”میں صرف ایک سیکنڈ کے فرق سے موت کے منہ میں جانے سے بچ گیا“
یہ جشن فٹبال کے ایک میدان میں ہو رہا تھا، جس کے باہر سرخ مٹی کا ایک ٹیلہ تھا۔ مکولو ڈوس کے مطابق وہ دیگر مہمانوں سے الگ ہو کر سگریٹ پینے جا رہے تھے، جب انہوں نے اچانک مٹی کا تودہ گرنے کی آواز سنی
انہوں نے کہا ”میں نے فوری طور پر مڑ کر اس طرف دیکھا، جہاں میں بیٹھا تھا لیکن مجھے نہ تو حاضرین نظر آئے اور نہ ہی کرسیاں۔۔ وہ سب مٹی تلے دب گئے تھے“
زندہ بچ جانے والوں میں شامل فوٹوسو کلاڈ مائیکل نامی شخص کے لیے خطرے کی پہلی گھنٹی اس وقت بجی، جب اوپر سے ایک پتھر گر کر ان کے سر پر لگا۔ جب انہوں نے اوپر دیکھا تو انہیں مٹی نیچے کی جانب سرکتی ہوئی دکھائی دی
مائیکل بتاتے ہیں ”میں اپنی جگہ سے چھلانگ لگا کر اٹھا، لیکن زمین پر گر گیا۔ میں دوبارہ اٹھا لیکن دوسری بار بھی گر گیا“
مٹی تلے جزوی طور پر دب جانے والے مائیکل ان لوگوں میں شامل تھے، جنہیں مقامی لوگوں نے اپنی مدد آپ کے تحت نکالا
اس سانحے میں مائیکل کی والدہ، بھائی اور بہترین دوست انتقال کر گئے۔ انہوں نے کہا ”میرا دل ٹوٹ گیا ہے“
حکام نے اس افسوس ناک واقعے کی وجوہات کے بارے میں کوئی معلومات نہیں دیں
سینٹر ریجن کے گورنر ناصری پال بیا کے مطابق ابتدائی طور پر چودہ افراد کی ہلاکت کا اعلان کیا گیا تھا لیکن بعد ازاں یہ تعداد بڑھ کر پندرہ ہو گئی جبکہ چار افراد زخمی بھی ہوئے
خیال کیا جاتا ہے کہ کیمرون میں 2019ع کے بعد یہ سب سے مہلک لینڈ سلائیڈنگ ہے
لینڈ سلائیڈنگ کے فوراً بعد زندہ بچ جانے والوں کو نکالنے کے لیے دوڑتے ہوئے آنے والے مقامی باشندوں میں سے ایک یویس برٹرینڈ ایلا کی ہتھیلیوں پر کھدائی کرنے سے چھالے پڑ گئے تھے
ان کا کہنا تھا ”ہم نے ملبے سے کئی ایسے افراد کو نکالا، جو اب بھی سانس لے رہے تھے لیکن بعد میں وہ موقع پر ہی دم توڑ گئے کیونکہ انہیں ہسپتال منتقل کرنے کا فوری طور پر کوئی ذریعہ نہیں تھا“
یویس نے کہا ”یہ ایک بہت ہی افسوسناک اور خوفناک واقعہ ہے۔ میں نے ایسا کبھی نہیں دیکھا۔ ہمارے نوجوان ہر روز وہاں فٹبال کھیلتے ہیں.“
