پاکستانی نژاد ہولی وڈ امریکی اداکار فاران طاہر نے اپنی فلم ’آئی ول میٹ یو دیئر‘ کی نمائش پر پاکستان میں پابندی عائد کیے جانے پر ناراضگی کا اظہار کرتے ہوئے کہا ہے کہ ان کی فلم میں کوئی بھی نامناسب بات نہیں تھی
واضح رہے کہ فاران طاہر کی فلم ’آئی ول میٹ یو دیئر‘ کو پاکستان میں گزشتہ ماہ 11 مارچ کو ریلیز کیا جانا تھا لیکن سینٹرل بورڈ آف فلم سینسر (سی بی ایف سی) نے فلم میں اقدار کو منافی انداز میں پیش کرنے کی وجہ سے اس پر پابندی عائد کردی تھی
اس وقت فلم کی پروڈیوسر ارم پروین بلال نے بھی شوبز ویب سائٹ ورائٹی سے بات کرتے ہوئے اپنی فلم کی پاکستان میں نمائش کی پابندی پر افسوس کا اظہار کیا تھا
فلم پر پاکستان میں پابندی عائد کیے جانے پر اس وقت فاران طاہر نے کوئی رد عمل نہیں دیا تھا، تاہم اب انہوں نے سوشل میڈیا پوسٹ کے ذریعے اپنے خیالات کا اظہار کیا ہے
فاران طاہر نے شوبز ویب سائٹ کی خبر کا حوالہ دیتے ہوئے اپنی پوسٹ میں لکھا کہ ان کی فلم ہمارے بنیادی اقدار کو بدنام نہیں کرتی بلکہ ہمارے مسائل پر بحث کی حوصلہ افزائی کرتی ہے
انہوں نے لکھا کہ ’فلم کا پیغام محبت، افہام و تفہیم، رواداری اور احترام کو تلاش کرنا ہے، فلم میں ان اقدار پر بحث کو دکھایا گیا ہے جو ہمارے خالق نے ہمارے لیے طے کیے ہیں‘
تاہم ہولی وڈ اداکار نے تسلیم کیا کہ ”فلم کا بعض مواد تخلیقیت کی وجہ سے ‘حدود سے گزر جاتا ہے’ مگر اسے بنیاد بنانے کے بجائے اسے نظر انداز کیا جا سکتا تھا“
انہوں نے فلم پر پابندی کو مایوس کن اور افسوس ناک قرار دیا اور لکھا کہ پاکستان میں صرف ڈھائی سو سینما ہیں، جس کا مطلب یہ ہے کہ فلم کو پیسے کمانے کے لیے وہاں پیش نہیں کیا جا رہا تھا بلکہ لوگوں کو اپنے مسائل کے حوالے سے معلومات کے لیے اسے وہاں ریلیز کیا جا رہا تھا
فاران طاہر کے مطابق ان کا مقصد ساتھی اداکاروں، ہدایت کاروں اور لکھاریوں کو پاکستانیوں کے ساتھ روزانہ کی بنیاد پر بیرون ممالک میں پیش آنے والے مسئلے پر بنی فلم کو دکھا کر انہیں احساس دلانا تھا کہ ایسے مواد بھی تیار کیے جا سکتے ہیں
فاران طاہر کی فلم ’آئی ول میٹ یو دیئر‘ میں ان کے علاہ سینیئر اداکار قوی خان، نکیتا تیوانی اور شان پارسنزسمیت دیگر اداکار شامل تھے
فلم میں پاکستانی اور بھارتی نژاد اداکاروں کے علاوہ امریکی اداکاروں کو بھی کاسٹ کیا گیا تھا اور اس کی کہانی امریکا میں مقیم ایک پاکستانی نژاد خاندان کے گرد گھومتی ہے
فلم میں فاران طاہر نے پاکستانی نژاد امریکی پولیس افسر کا کردار ادا کیا ہے، جن کی جواں سالہ بیٹی پیدائش اور پرورش امریکا میں ہونے کی وجہ سے دیسی روایات سے دور ہوتی ہیں
فلم کی کہانی اس وقت اہم بن جاتی ہے، جب فاران طاہر کے والد کا کردار ادا کرنے والے قوی خان پاکستان سے امریکا پہنچتے ہیں اور پھر خاندان میں مسلم اور مشرقی روایات پر بحث شروع ہو جاتی ہے.
