’آسکر‘ کی 94ویں تقریب کے دوران میزبان کرس راک کو تھپڑ رسید کرنے کے واقعے کے بعد اکیڈمی انتظامیہ نے ہولی وڈ اداکار ول اسمتھ پر دس سال تک تقریب میں شرکت نہ کرنے کی پابندی عائد کر دی ہے
اکڈمی انتطامیہ کے اس فیصلے سے قبل ہی ول اسمتھ 2 اپریل 2022 کو اپنے عمل پر شرمندہ ہوکر آسکر کی رُکنیت چھوڑنے کا اعلان کرچکے تھے
خبر رساں ادارے ’ایجنسی فرانس پریس‘ (اے ایف پی) کی رپورٹ کے مطابق اداکار ول اسمتھ کو آسکر انتظامیہ نے ان کی بدسلوکی کی بنا پر اکیڈمی اف موشن پکچر آرٹس اینڈ سائنسز میں بھی شرکت کی ممانعت کردی
رپورٹ کے مطابق آسکر کے صدر اور چیف ایگزیکٹو افسر (سی ای او) کی جانب سے 8 اپریل 2022 سے اگلے دس سال کے لیے ول اسمتھ پابندی عائد کی گئی، جس کے بعد اب وہ ایک دہائی تک آسکر سمیت دیگر ایوارڈز تقریبات میں شرکت کے اہل نہیں کر سکیں گے
رپورٹ میں بتایا گیا کہ اداکار کے لیے سزا کا تعین بورڈ ممبران کی ایک میٹنگ میں کیا گیا، جس میں پابندی عائد کرنے کے علاوہ یہ فیصلہ بھی کیا گیا کہ اداکار سے ان کا حال ہی میں اپنی فلم کنک ریچرڈ کے نمایاں کردار ولیم ریچرڈ پر حاصل کیا گیا بہترین اداکار کا ایوارڈ واپس نہ لیا جائے
آسکر اکیڈمی کی جانب سے بیان میں مزید کہا گیا کہ ول اسمتھ کی اس بدسلوکی کے بعد اکیڈمی بورڈ کے ایک بیان میں بتایا گیا کہ گزشتہ سال بہترین کارکردگی کرنے والے انڈسٹری کے افراد کے لیے یہ 94 واں آسکر ایک خوشی کا موقع تھا جو کہ ول اسمتھ کے ناقابلِ قبول اور بدترین رویے کی وجہ سے ماند پڑ گیا
واضح رہے کہ ول اسمتھ نے 28 مارچ کو ہونے والی آسکر تقریب کے دوران میزبان کرس راک کو اہلیہ کے بالوں پر مزاق اُڑانے پر اسٹیج پر آکر تھپڑ رسید کیا تھا
تھپڑ کی وڈیو جیسے ہی وائرل ہوئی، دنیا بھر کے سوشل میڈیا پلیٹ فارمز پر صارفین نے ول اسمتھ کو تنقید کا نشانہ بنایا تو کچھ نے ان کی حمایت بھی کی
ول اسمتھ نے خود پر تنقید کے بعد کرس راک سے معافی بھی مانگی تھی اور بعد ازاں 2 اپریل کو انہوں نے آسکر موشن پکچرز اکیڈمی کی رُکنیت بھی چھوڑ دی تھی مگر اب اکیڈمی نے ان پر آئندہ ایک دہائی تک ایوارڈز تقریب میں شرکت کرنے پر پابندی عائد کردی.
