اسلاموفوبیا کی بڑھتی ہوئی لہر کے خلاف مسلمانوں سے اظہار یکجہتی اور مذہبی رواداری اور افہام و تفہیم کو بہتر بنانے کے لیے رمضان کے مقدس مہینے میں دنیا بھر سے غیر مسلموں نے دو مہمات میں حصہ لیا
عرب نیوز کے مطابق 25 سے زیادہ ملکوں نے سالانہ ’فاسٹ فار یونیٹی‘ یعنی روزہ برائے اتحاد اور 30 روزہ ’رمضان حجاب‘ کے عنوان سے ہونے والے چیلنجز میں حصہ لیا، جن کا آغاز رمضان کے پہلے دن سے ہوا
ان کا اہتمام ایک غیرمنافع بخش تنظیم ورلڈ حجاب ڈے نے کیا ہے۔ اس تنظیم کا مقصد مسلمانوں کے خلاف امتیازی سلوک کا مقابلہ کرنا ہے
تنظیم کا کہنا ہے ”فاسٹ فار یونٹی کے عنوان سے روزے کا چیلنج غیرمسلموں کو ایک، دو، دس یا تمام تیس دن کے روزے رکھنے کی دعوت دیتا ہے تاکہ غیرمسلم یہ تجربہ کر سکیں کہ مسلمان کیسے روزہ رکھتے ہیں اور کیسے وہ خود احتسابی کا روحانی سفر طے کرتے ہیں اور اسلامو فوبیا کے خلاف اپنا موقف اپناتے ہیں“
معروف برطانوی گلوکارہ کیٹ اسٹیبلز بھی ان متعدد غیرمسلموں میں سے ایک ہیں، جنہوں نے اس چیلنج میں حصہ لیا
انہوں نے انسٹاگرام پر پوسٹ کیا کہ یہ دوسرا سال ہے کہ وہ چیلنج میں حصہ لے رہی ہیں
ان کا کہنا ہے ’جیسے نام سے معلوم سے ہوتا ہے، ہیش ٹیگ ‘فاسٹ فار یونٹی’ اسلاموفوبیا کو ختم کرنا اور مذہب اور اختلافات سے قطع نظر اپنی کمیونٹیز میں شامل ہونے کا آغاز ہے۔ برائے مہربانی میری سب سے درخواست ہے کہ معاشرے میں زیادہ سے زیادہ ہم آہنگی اور ایک دوسرے کے لیے ہمدردی کا مظاہرہ کریں۔‘
حجاب چیلنج جو ہیش ٹیگ حجاب 30 کے نام سے بھی جانا جاتا ہے، 2014 میں شروع ہوا۔ یہ تمام رنگ و نسل کی خواتین کو تیس دن حجاب پہننے کی دعوت دیتا ہے، جس کا مقصد حجاب پہننے والی خواتین کے خلاف امتیازی سلوک ختم کرنا ہے
یہ چیلنجز متعارف کرنے والی تنظیم ’دی ورلڈ حجاب ڈے‘ نیویارک میں 2013 میں قائم ہوئی تھی، جو ہر سال عالمی حجاب ڈے کا اہتمام کرتی ہے
تنظیم کا کہنا ہے کہ سال2021 میں کونسل آن امیریکن اسلامک ریلشنز نے اپنی رپورٹ میں انکشاف کیا تھا کہ 61 فیصد مسلمان طلبہ کا ان کے عقیدے کی وجہ سے تمسخر اڑایا گیا اور ان کو ہراساں کیا گیا
سال 2020 میں کیے گئے ایک اور سروے کے مطابق 30 فیصد مسلمان طلبہ نے کہا کہ استاد اور دیگر اسکول کا عملہ ان کی ہراسگی کا ذریعہ بنا.
