ناریل کا پانی جسم میں نمی کے لیے ایک بہترین قدرتی ذریعے کے طور پر جانا جاتا ہے۔ تحقیق کے مطابق یہ معدے کے لیے ہلکا ہوتا ہے اور اس میں بہت سے اہم غذائی اجزا اور معدنیات پائے جاتے ہیں
لیکن حال ہی میں العربیہ ڈاٹ نیٹ نے بولڈ اسکائی ہیلتھ ویب سائٹ کے حوالے سے ایک رپورٹ شائع کی ہے، جس میں بتایا گیا ہے کہ ناریل کا پانی بہت سے فوائد رکھنے کے باوجود کچھ نقصانات بھی رکھتا ہے
رپورٹ میں ناریل کے پانی کے ممکنہ نقصانات کی نشاندہی کرتے ہوئے بتایا گیا ہے کہ ناریل کے پانی میں زیادہ پیشاب پیدا کرنے کی خصوصیات ہوتی ہیں، یہ پانی زیادہ پینے سے گردوں پر دباؤ بھی پڑتا ہے، اور ان کو ضرورت سے زیادہ پانی سے نجات حاصل کرنے کے لیے زیادہ کام کرنا پڑتا ہے
رپورٹ کے مطابق ناریہ کے پانی میں کیلوریز کی خاصی مقدار ہوتی ہے۔ ذیابیطس کے مریضوں کو اسے پینے سے پرہیز کرنا چاہیے
رپورٹ میں بتایا گیا ہے کہ ناریل کا پانی زیادہ مقدار میں پینے سے بلڈ پریشر میں کمی آتی ہے، اس لیے کم بلڈ پریشر والے افراد کو اس کو محدود مقدار میں پینا چاہیے
امریکی محکہ زراعت کے مطابق جو لوگ ہائی بلڈ پریشر یا دل کے عارضے میں مبتلا ہیں، ان کو ناریل کے پانی کے استعمال سے بچنا چاہیے کیونکہ اس سے جسم میں سوڈیم کی سطح متاثر ہوتی ہے
جبکہ رپورٹ میں یہ بھی بتایا گیا ہے کہ ناریل کا پانی ان افراد کے لیے موزوں نہیں ہے جو کچھ کھانے پینے یا مشروبات سے الرجی کا شکار ہوجاتے ہیں، اس کی وجہ یہ ہے کہ ناریل کا پانی پینے سے ان میں الرجک ردعمل پیدا ہوسکتا ہے
رپورٹ کے مطابق ناریل کے پانی میں پوٹاشیم کی مقدار زیادہ ہونے کی وجہ سے اس کا زیادہ مقدار میں استعمال ہائپر کلیمیا کا سبب بن سکتا ہے، جس سے کمزوری پیدا ہوتی ہے، چکر آتے ہیں جبکہ انسان ہوش بھی کھو سکتا ہے
اگر آپ وزن نہ بڑھنے کے بارے میں فکرمند ہیں تو تازہ ناریل کا پانی کیلوریز والے ڈبہ پیک جوسز سے کہیں زیادہ بہتر ہے
ناریل کے پانی میں کاربوہائیڈریٹ کم ہوتا ہے، اس لیے یہ اسپورٹس سے تعلق رکھنے والے افراد کے لیے زیادہ بہتر نہیں ہے
علاوہ ازیں ناریل کا پھل کھولے جانے کے فوراً بعد اس کا پانی پینا چاہیے کیونکہ اگر یہ زیادہ دیر تک کھلا پڑا رہے تو اس میں موجود تمام ضروری غذائی اجزا ضائع ہو جاتے ہیں
ناریل کا پانی فائبروس کے مریضوں کے لیے موزوں نہیں، یہ ایک جینیاتی بیماری ہے جو پھیپھڑوں اور نظام انہضام کو متاثر کرتی ہے اور جسم میں نمک کی سطح کو کم کرتی ہے کیونکہ اس میں پوٹاشیم کی زیادہ مقدار ہوتی ہے
خیال رہے کہ ناریل کے پانی کے متوقع نقصان کے بارے میں ان تمام انتباہات کے باوجود ماہرین یہ بات زور دے کر کہتے ہیں کہ یہ ایک صحت مند پھل ہے، البتہ اسے زیادہ کھانے کی صورت میں یہ نقصانات ہو سکتے ہیں.
