”ہمارے علاقے کی گیس پورے ملک کو جاتی ہے مگر ہم پانی کی بوند بوند کو ترس رہے ہیں۔ جانور پیاس سے مر رہے ہیں، ہمارے بچے ایسا گندا اور بدبودار پانی پینے پر مجبور ہیں، جس کے جوہڑ کے قریب کسی دوسرے علاقے کا شخص شاید چند سیکنڈ کے لیے بھی کھڑا نہ ہو پائے“
یہ کہنا ہے گیس سے مالا مال بلوچستان کے ضلع ڈیرہ بگٹی کی سب تحصیل پیرکوہ کے رہائشی محمد بخش بگٹی کا، جن کے چار بچوں سمیت گھر کے بیشتر افراد گندا پانی پینے کی وجہ سے ہیضے کا شکار ہوچکے ہیں۔ ان کا ایک بچہ اب بھی پیرکوہ کے سرکاری ہسپتال میں زیرعلاج ہے
محمد بخش بگٹی نے بتایا کہ شدید قے اور مسلسل دست کی وجہ سے بیٹا بہت کمزور ہو گیا ہے اور اس کی آنکھیں تک دھنس گئی ہیں
دوسری جانب ڈیرہ بگٹی کے ڈسٹرکٹ ہیلتھ افسر محمد اعظم بگٹی کے مطابق پیرکوہ میں پینے کے صاف پانی کی قلت کی وجہ سے ہیضہ وبائی شکل اختیار کر چکا ہے
انہوں بتایا کہ اس سے اب تک دو افراد کی موت ہوچکی ہے، جبکہ پندرہ سو سے زائد افراد شدید بیمار ہو کر ہسپتال پہنچے ہیں
جبکہ ڈیرہ بگٹی سے تعلق رکھنے والے سینیٹر میر سرفراز احمد بگٹی کہتے ہیں کہ چالیس ہزار آبادی والے اس علاقے میں ہیضہ سے متاثر ہونے والوں کی تعداد کئی گنا زیادہ ہے
پیرکوہ کے ایک اور قبائلی رہنما قادر بگٹی کے مطابق ہیضے کی وبا سے اب تک بارہ افراد کی ہلاکتیں ہوئی ہیں
انہوں نے مرنے والوں کے مکمل کوائف شیئر کرتے ہوئے بتایا کہ ’ہلاک ہونے والوں میں 9 بچے بھی شامل ہیں‘
قادر بگٹی کا کہنا ہے کہ متاثرین کی تعداد بھی دو ہزار سے زائد ہے اور روزانہ تین سو سے زائد افراد مختلف سرکاری و نجی ہسپتالوں میں پہنچ رہے ہیں
انہوں نے وزیراعظم اور وزیراعلیٰ بلوچستان سے فوری طور پر امدادی ٹیمیں علاقے میں بھیجنے کی اپیل کی
عالمی ادارہ صحت نے بھی علاقے کی صورتحال کو تشویشناک قرار دیتے ہوئے کوئٹہ سے خصوصی ٹیم ڈیرہ بگٹی بھیجی ہے اور ساتھ ہی خبردار کیا ہے کہ متاثرین کے علاج و معالجہ اور بیماری کے تدارک کے لیے فوری اقدامات نہ کیے گئے تو صورتحال مزید ابتر ہو سکتی ہے
متاثرہ علاقے کے رہائشیوں کا کہنا ہے کہ پیرکوہ کے دو کمروں پر مشتمل سرکاری بنیادی مرکز صحت (بی ایچ یو) میں مریضوں کے لیے جگہ کم پڑ گئی ہے اور مریضوں کو زمین پر لٹا کر علاج فراہم کیا رہا ہے
حکام کے مطابق صرف منگل کو 121 مریضوں کو پیرکوہ کے دو بی ایچ یوز میں داخل کیا گیا لیکن دونوں ہسپتالوں میں مجموعی بستروں کی تعداد پندرہ سے بھی کم ہے، اس لیے مریضوں کو کرسیوں پر بٹھا کر یا پھر کمرے کے باہر دیوار کے سایے میں زمین پر لٹا کر طبی امداد دینا پڑ رہی ہے
ڈی ایچ او ڈیرہ بگٹی محمد اعظم بگٹی کا کہنا ہے کہ ہم نے علاقے میں خصوصی ٹیمیں بھجوائی ہیں۔ بہت سے ایسے مریض بھی دوبارہ بیمار ہو کر ہسپتال کا رخ کررہے ہیں، جنہیں تین چار دن پہلے طبی امداد فراہم کی گئی کیونکہ لوگوں کے پاس پینے کا صاف پانی نہیں اور وہ جوہڑوں کا گندا پانی پینے پر مجبور ہیں
انہوں نے بتایا کہ پیرکوہ کے لوگوں کو علاقے میں کام کرنے والی نیم سرکاری گیس کمپنی او جی ڈی سی ایل پانی فراہم کرتی ہے
انہوں نے بتایا ”یہ پانی پتھر نالہ نامی برساتی نالے سے پمپنگ مشینوں کے ذریعے تالاب میں جمع کرنے کے بعد تقسیم کیا جاتا ہے۔ ہم نے اس پانی کا لیبارٹری ٹیسٹ کرایا تو معلوم ہوا کہ یہ انسانی استعمال کے قابل ہی نہیں“
ان کا کہنا تھا کہ گیس کمپنی کو چاہیے تھا کہ وہ تالاب سے پانی کی فراہمی سے پہلے اس میں کلورین شامل کرتی لیکن بیماری پھیلنے کے بعد ہماری درخواست کے باوجود بھی کلورین کا استعمال نہیں کیا گیا۔ اب ہم نے یونیسف اور صوبائی حکومت سے درخواست کر کے خود کلورین کا بندوبست کر لیا ہے
محمد اعظم بگٹی کا مزید کہنا تھا کہ علاقے کے لوگ پہلے بھی تالابوں اور جوہڑوں کا پانی پیتے تھے، مگر پہلے بارشیں ہوتی تھیں تو صورتحال بہتر ہوجاتی تھی۔ اس بار گزشتہ آٹھ مہینوں سے علاقے میں بارش نہیں ہوئی، جس کی وجہ سے جوہڑوں میں جمع پانی مزید گندا اور زہریلا بن گیا ہے مگر لوگ اس کا استعمال کرنے پر مجبور ہیں
پیرکوہ کے رہائشی محمد بخش بگٹی کا کہنا ہے کہ پانی تو پہلے بھی کڑوا ہوتا تھا مگر اس سال بارشیں نہ ہونے کی وجہ سے اتنا کڑوا اور گندا ہے کہ کسی اور علاقے میں جانور بھی اسے نہ پیے مگر ہمارے پاس اسے پینے کے سوا کوئی چارہ نہیں
انہوں نے بتایا کہ رمضان میں کچھ مخیر لوگوں نے پچیس کلومیٹر دور ڈیرہ بگٹی سے پانی کے کچھ ٹینکر بھیجے. عید پر ٹینکر آنا بند ہوئے تو لوگوں نے مجبور ہوکر زہریلا اور کڑوا پانی پینا شروع کیا۔ اس طرح لوگ بیمار ہونا شروع ہو گئے
ان کا کہنا تھا کہ ڈیرہ بگٹی تک کا راستہ کچا ہے اور ٹینکر والے ایک ٹینکر کے تین سے چار ہزار روپے مانگتے ہیں، جبکہ یہاں کے لوگ انتہائی غریب ہیں وہ خرید نہیں سکتے
محمد بخش بگٹی کا کہنا تھا کہ ہمارے علاقے میں گیس کے درجنوں کنویں ہیں، یہاں سے گیس نکل کر پورے ملک کو جاتی ہے، مگر حکومت کی غفلت کا یہ نتیجہ ہے کہ علاقے کے لوگوں کے پاس پینے کا صاف پانی تک نہیں
انہوں نے کہا ’گرمیوں میں ہم پانی کی ایک بوند بوند کو ترستے ہیں۔ انسان اور جانور ایک ہی جوہڑ سے گندا پانی پینے پر مجبور ہیں جس کی وجہ سے آج ہمارے بچے، خواتین اور جانور بھی مر رہے ہیں‘
ان کا کہنا تھا کہ صاف پانی کے لیے جب پانی کا ٹینکر ڈیرہ بگٹی سے آتا ہے تو لوگ اپنا سب کام کاج چھوڑ کر لمبی قطاروں میں گھنٹوں انتظار کرنا پڑتا ہے
ڈیرہ بگٹی سے تعلق رکھنے والے بلوچستان عوامی پارٹی کے سینیٹر سرفراز احمد بگٹی کا کہنا ہے کہ 70 کی دہائی میں پیرکوہ میں گیس کے ذخائر دریافت ہوئے تو یہاں آبادی بڑھنا شروع ہوئی۔ 2015 تک گیس کمپنی پانی فراہم کرتی رہی، اس کے بعد علاقے میں گیس کے ذخائر کم ہونا شروع ہوئے تو کمپنی نے اپنا کام سمیٹنا شروع کر دیا
ان کا کہنا تھا کہ 2017 میں ہماری صوبائی حکومت نے 30 کروڑ روپے کی لاگت سے ٹیوب ویل لگا کر پیرکوہ کو پانی کی فراہمی کا منصوبہ بنایا جس پر 50 سے 60 فیصد تک کام بھی ہوگیا مگر نئی حکومت کے آنے کے بعد اس پر کام روک دیا گیا
سینیٹر سرفراز احمد بگٹی کے مطابق علاقے کے لوگوں کو صاف پانی کی فراہمی کی ذمہ داری بلوچستان حکومت کی ہے، اس لیے اس زیر التوا منصوبے کو جلد مکمل کیا جائے اور علاقے کے لوگوں کو مرنے سے بچایا جائے
دوسری جانب ڈیرہ بگٹی میں موجود ڈبلیو ایچ او کے پبلک ہیلتھ سرویلنس آفیسر ڈاکٹر داؤد ریاض نے بتایا کہ بیس متاثرہ افراد کے سیمپل لے کر ٹیسٹ کے لیے اسلام آباد کے نیشنل انسٹیٹیوٹ آف ہیلتھ بھجوائے جن میں سے سولہ میں ویبریوکولرا (ہیضہ) کی تصدیق ہوئی ہے
ان کا کہنا تھا کہ یہ ڈائریا کی شدید شکل ہے اور اس سے متاثر ہونے والوں کو شدید دست اور قے ہوتی ہے اور جسم میں پانی اور نمکیات کی شدید کمی پیدا ہوجاتی ہے۔ اگر بروقت طبی امداد نہ دی جائے تو چند گھنٹوں میں ہی مریض کی موت ہو سکتی ہے
ڈاکٹر داؤد ریاض نے بتایا کہ متاثرہ مریضوں پر عام انٹی بائیوٹیک ادویات بھی اثر نہیں کر رہیں۔ این آئی ایچ نے لیبارٹری ٹیسٹ کے بعد بتایا ہے کہ متاثرہ مریضوں میں صرف دو مخصوص اقسام کے انٹی بائیوٹیک (ٹیٹرا سائیکلین اور سپروکسن) کارگر ثابت ہوسکتی ہیں، لیکن ڈیرہ بگٹی کے سرکاری ہسپتالوں اور عام مارکیٹ میں ان ادویات کی قلت ہے
ڈاکٹر داؤد ریاض کے مطابق پیرکوہ میں پانچ افراد کی بیماری سے موت ہوئی ہے، جن میں دو کے بارے میں تصدیق ہوچکی ہے کہ وہ ہیضہ سے ہوئی ہے جبکہ تین اموات اب تک مشکوک ہیں۔
ان کا کہنا ہے کہ متاثر ہونے والوں میں 60 فیصد خواتین اور بچے ہیں، جن کی قوت مدافعت پہلے سے ہی غذائیت کی کمی کی وجہ سے کمزور ہیں
ڈاکٹر داؤد ریاض کا کہنا تھا کہ ہیضہ متاثرہ فرد کے فضلے سے پھیلتا ہے۔ اس لیے اسے قابو کرنے کے لیے فوری اقدامات کی ضرورت ہے
انہوں نے کہا ’ہم نے صوبائی حکومت کو پیرکوہ کے رہائشیوں کو تین مہینوں تک بلا تعطل صاف پانی فراہم کرنے، کوئٹہ سے خصوصی ریپڈ رسپانس میڈیکل ٹیمیں، ضروری ادویات اور پانی صاف کرنے والے آلات کی فراہمی کے ساتھ ساتھ ضلعی ہیڈ کوارٹر ہسپتال ڈیرہ بگٹی میں تین مہینوں کے لیے عارضی ڈائریا ٹریٹمنٹ سینٹر بنانے کی تجاویز دی ہیں۔‘
ڈسٹرکٹ ہیلتھ افسر محمد اعظم بگٹی کے مطابق ضلعی انتظامیہ، محکمہ پبلک ہیلتھ، انجینیئرنگ ڈیپارٹمنٹ اور ایف سی نے صاف پانی کے بیس ٹینکرز علاقے میں بھیجے ہیں لیکن صاف پانی کے مستقل انتظام کے بغیر اس بیماری پر قابو پانا مشکل ہے.
