دس مہینے پہلے برطانیہ کے دریائے وائی میں اپنا موبائل فون گنوا دینے والے ایک شخص کو اس کا فون پھر سے مل گیا ہے اور حیرت انگیز طور پر یہ اب بھی کام کر رہا ہے
اوین ڈیوس نامی شخص نے اگست سنہ 2021ع میں گلوسٹر شائر میں کشتی چلاتے ہوئے اپنا آئی فون گرا دیا تھا
رواں ماہ میگویل پیچیکو نامی شخص کو یہ فون ملا اور اس نے اسے خشک کر کے اس کے مالک کا پتہ لگانے کی غرض سے اس کی تصاویر آن لائن پوسٹ کر دیں
میگویل کا کہنا تھا ”مجھے نہیں لگتا تھا کہ یہ فون اتنی اچھی حالت میں ہوگا۔ یہ پانی سے بھرا ہوا تھا
بی بی سی ریڈیو گلوسیسٹر شائر سے بات کرتے ہوئے انہوں نے کہا کہ فون کو خشک کرنے کی بہت کوشش کی کیونکہ ممکن تھا کہ اس میں موجود چیزوں سے مالک کی جذباتی وابستگی ہو
’میں جانتا ہوں کہ اگر میں نے اپنا فون کھو دیا ہوتا جس میں میرے بچوں کی بہت سی تصاویر ہیں، میں جانتا ہوں کہ میں اسے واپس حاصل کرنا چاہوں گا‘
ڈرائی بروک سے تعلق رکھنے والے پچیکو نے فون ملنے کے بعد اسے ایئرلائن اور کمپریسر سے خشک کیا، پھر اسے رات بھر مزید خشک ہونے دیا
ان کا کہنا تھا ’صبح جب میں نے اسے چارج کیا تو مجھے یقین ہی نہیں آیا‘
اسکرین سیور پر 13 اگست کی تاریخ کے ساتھ ایک مرد اور عورت کی تصویر دکھائی دی۔ یہ وہ دن تھا جب فون پانی میں گرا تھا
فیسبک پر مقامی گروپ سنڈر نوٹس بورڈ پر یہ تصاویر پوسٹ کی گئی، جہاں سے انہیں چار ہزار سے زیادہ مرتبہ شیئر کیا گیا
فون کے مالک کے گذشتہ چھ ماہ سے سوشل میڈیا سے دور رہنے کے باوجود، تصویر کو بالآخر ایڈنبرا میں رہنے والے اوین ڈیوس اور اس کی منگیتر فیونا گارڈنر کے دوستوں نے پہچان لیا
ڈیوس کا کہنا تھا ’میں دو افراد کے لیے بنی کینوی (کشتی) میں تھا اور میری ساتھی کھڑی ہو گئیں اور ہم گر گئے۔‘
’فون میری پچھلی جیب میں تھا اور جیسے ہی یہ پانی میں گیا مجھے احساس ہوا کہ فون غائب ہو گیا ہے۔‘
وہ پیچیکو کی جانب سے فون واپس کرنے کے لیے کی جانے والی کوششوں سے بہت متاثر ہوئے
ان کا کہنا تھا ”میرا ردعمل یہ ہوتا کہ میں اسے کسی قریبی شراب خانے میں دے دیتا نہ کہ اسے خشک کرنے کے لیے اپنی ایئر کمپریسر کا استمعال کرتا“
