سندھ کے دارالحکومت کراچی کی سینٹرل جیل میں موجود قیدیوں کو چینی زبان سکھانے کے لیے کلاسز کا آغاز ہو گیا ہے
چینی زبان سیکھنے کا یہ کورس چھ ماہ تک جاری رہے گا اور اس میں ابتدائی طور پر تیس قیدیوں نے داخلہ لیا ہے
قیدیوں کو ہنر مند بنانے اور ان کی اصلاح کرنے کے مقصد کے تحت سندھ بھر کی جیلوں میں مختلف اقدامات کیے جا رہے ہیں، سینٹرل جیل کراچی میں چینی زبان سکھانے کا کورس بھی اسی کا حصہ ہے
اس حوالے سے ابتدائی کورس ڈیزائن کیا گیا جس میں روز مرہ کے استعمال میں آنے والے جملے، گرامر، گنتی اور دیگر چیزوں کو شامل کیا گیا ہے، سینٹرل جیل میں چینی زبان سیکھنے کے پروگرام میں ابتدائی طور پر تیس قیدیوں نے ایڈمیشن لیا ہے ، جنہیں متعلقہ کتابیں اور دیگر لٹریچر بھی فراہم کردیا گیا ہے
ایک کمرے کو اس کام کے لیے باقاعدہ کلاس بنایا گیا ہے، جس میں نصب بورڈ چھوٹے چھوٹے جملے لکھے گئے ہیں، جیسے سلام دعا کرنا، گڈ مارننگ، گڈ آفٹر نون، حال احوال پوچھنا وغیرہ شامل ہیں
پروگرام کے تحت ہر کلاس کے اختتام پر قیدیوں کو ایک دوسرے کے ساتھ چینی زبان میں بات چیت کی عملی مشق بھی کرائی جاتی ہے
چینی زبان سکھانے والے اساتذہ کا کہنا ہے کہ قیدیوں کی جانب سے اس پروگرام کو بھرپور پذیرائی مل رہی ہے اور توقع سے بڑھ کر انہیں کورس میں شامل افراد کی دلچسپی نظر آرہی ہے، کیونکہ قیدی چینی زبان سیکھنے کی لگن اور جذبے سے سرشار ہیں اور بھرپور جوش و خروش کے ساتھ یہ زبان سیکھ رہے ہیں
انہوں نے بتایا کہ ابتدائی طور پر انہیں چھوٹے چھوٹے جملے سکھائے جارہے ہیں، پہلا بنیادی کورس چھ ماہ کا ڈیزائن کیا گیا ہے جبکہ اس کے بعد پھر ایڈوانس کورس کا اجرا کیا جائے گا، پھر بتدریج مرحلہ وار کورس کو آگے بڑھایا جائے گا تاکہ قیدی مکمل طور پر چینی زبان میں بات چیت کرنے کے قابل بن سکیں
اساتذہ کا مزید کہنا تھا کہ ویسے تو مختلف قیدی اپنی پرفارمنس پیش کر رہے ہیں لیکن حمزہ نامی ایک قیدی اس وقت بولنے، لکھنے اور بات کرنے میں ٹاپ پر ہے
دوسری جانب سینٹرل جیل کے سینئر سپرنٹنڈنٹ محمد حسن سہتو نے کہا کہ قیدیوں کی اصلاح کے لیے ہی ’چینی لینگویج کورس‘ کا آغاز کیا گیا ہے تاکہ رہائی کے بعد قیدی جب باہر نکلیں تو وہ معاشرے کے مفید اور کارآمد شہری بن سکیں اور دوبارہ جرائم کی طرف مائل نہ ہوں۔
