ایک ایسی تصویر، جسے جس نے بھی دیکھا، وہ حیران ہوئے بغیر نہ رہ سکا۔ اس کی وجہ اُن کا مشکل، پُرخطر اور غیرقانونی کام تھا، لیکن ساتھ ہی یہ تصویر اپنے اندر کئی کہانیاں بھی سموئے ہوئے ہے
گران کیناری کے ساحل پر ان تین افراد کو بچانے کے دو دن بعد اب وہ بظاہر اپنے مقصد میں کامیاب ہو چکے ہیں، یعنی فی الحال انہیں اسپین میں رہنے کی اجازت دی گئی ہے
اطلاعات کے مطابق ’آلیتھن ٹو‘ نامی آئل ٹینکر، جس پر سوار ہو کر یہ تارکین وطن اسپین پہنچے تھے، کو ان تینوں افراد کے بغیر ہی اپنا سفر جاری رکھنے کا کہا گیا ہے
اسپین کی حکومت نے ان تارکینِ وطن کے متعلق تفصیلات بتاتے ہوئے کہا ہے ”یہ تینوں نائجیرین شہری ہیں اور انہوں نے اسپین پہنچتے ہی پناہ کی درخواست دی ہے۔ اس میں ایک شخص، جس کی حالت زیادہ خراب تھی، وہ ہسپتال میں زیرِ علاج ہے“
حکومتی اہلکاروں نے مزید بتایا ”اب یہ بحری جہاز ان کے بغیر اپنا سفر جاری رکھ سکتا ہے“
اس کا مطلب ہے کہ ہسپانوی حکومت نے آخر کار بحری جہاز کو بندرگاہ چھوڑنے اور ان تینوں تارکینِ وطن کو گران کیناری کے جزیرے پر ہی رہنے کی اجازت دے دی ہے
غیر سرکاری تنظیم ’کیمینینڈو فرونٹیراس‘ نے کہا ”اس طرح کے خطرناک سفر سے گزرنے کی حقیقت کو تینوں افراد کی ذاتی زندگی کے حالات کا تجزیہ کر کے سمجھا جانا چاہیے۔ اس لیے انہیں اسپین میں رہنے کی اجازت دی جائے“
اسی طرح این جی او نے حکومت سے سفارش کی تھی کہ وہ ان تینوں افراد کو تارکینِ وطن کے سینٹر میں رکھے تاکہ وہ پرخطر اور جان لیوا سفر کے واقعات کی نوعیت کے پیشِ نظر ذہنی اور نفسیاتی طور پر صحتیاب ہونے کے لیے ضروری مدد حاصل کر سکیں
یہ تینوں افراد بحری جہاز کے رڈر بلیڈ تک کیسے پہنچے، اس بارے میں معلومات نہیں ہیں، لیکن جو بات معلوم ہوئی ہے، وہ یہ ہے کہ یہ تینوں افراد نائجیریا کے ساحلی شہر لاؤس سے مالٹا کے بحری جہاز آلتھینی ٹو پر 17 نومبر کو سفر شروع کرنے سے قبل سوار ہوئے تھے
یہ بحری جہاز بنا کسی پڑاؤ کے گیارہ روز تک مسلسل سفر کر کے اسپین کے جزیرہ گران کیناری پہنچا تھا
پیر 28 نومبر کو سلوامنٹوں میری ٹائم نے ان کو جہاز کے نچلے حصے پر دیکھے جانے کے بعد لاس پالمس پہنچ کر بچایا تھا
بحری جہاز کے جس حصے پر یہ تینوں افراد دیکھے گئے تھے، اس جگہ کو ’رڈر بلیڈ‘ کہتے ہیں اور یہ جہاز کے ڈھانچے سے باہر نچلی سطح پر ہوتا ہے اور یہ کھلی جگہ ہوتی ہے۔ یہ تینوں افراد اس کھلی اور خطرناک جگہ پر موجود تھے اور انہیں سمندر کی طاقتور لہروں کا سامنا تھا
ای ایف ای نیوز ایجنسی کے مطابق ”لاس پالمس میں میری ٹائم رسکیو کوارڈینشن سینٹر کی سربراہ سوفیا ہرنینڈز کا کہنا تھا کہ جہاز کے جس حصے پر یہ تینوں افراد موجود تھے، یہاں کسی شخص کے لیے بیٹھنا ممکن نہیں ہے، کیونکہ کھلے سمندر میں سخت موسمی حالات اور پانی کی کمی کے باعث موت کا خطرہ بڑھ جاتا ہے۔ اس کے علاوہ ہائپوتھرمیا اور سمندر کی طاقتور لہریں بھی انھیں وہاں سے بہا کر لے جا سکتی تھیں۔“
ان تینوں افراد کی جہاز کے رڈر بلیڈ پر بیٹھے ہوئے جو تصویر منظرِ عام پر آئی ہے، وہ میری ٹائم ریسکیو کے اہلکار اورلینڈو راموس نے کھینچی تھی، جس نے انہیں وہاں سے بچایا تھا۔ میری ٹائم ریسکیو میں بچائے جانے والے افراد کی تصویر لینا عام بات ہے
اورلینڈو راموس نے بدھ کو جاری ایک سرکاری بیان میں تفصیلات بتاتے ہوئے کہا ”یہ معمول کی بات ہے۔ اصل کام، جو اہم تھا وہ ان تینوں جانوں کو بچانا تھا، ان لوگوں کی محفوظ مقام پر منتقلی کرنا تھا، جو کمزوری کی حالت میں ہائپوتھرمیا کے ساتھ آتے ہیں۔ ریسکیو کے دوران ایک ایسی تدبیر کرنا، جس سے ان کی جانوں کو خطرہ نہ ہو“
سلوامینٹو میری ٹائم فورس نے بتایا ”نائجیریا سے تعلق رکھنے والے یہ تینوں مرد تارکینِ وطن کمزوری اور ہایپوتھرمیا کا شکار تھے۔ ان میں سے دو کو ابتدائی طبی امداد کے لیے ہسپتال منقتل کیا گیا، جبکہ ایک شخص کی حالت نازک تھی، جسے انسولر ہسپتال میں داخل کیا گیا“
ان کا کہنا تھا ”اس وقت ان کی حالت کیسی ہے، اس بارے میں سرکاری سکیورٹی فورسز اور ادارے ہی بتا سکتے ہیں“
انہوں نے مزید کہا ”سلوامنٹو میری ٹائم فورس کا کام لوگوں کو بچانا اور ساحل تک پہنچانا ہے۔ ساحل پر پہنچنے کے بعد بچائے گئے افراد کی دیکھ بھال کی ذمہ داری ملک کی ہیلتھ سروسز اور سرکاری سکیورٹی فورسز کی ہوتی ہے“
حکام کے مطابق ”ان میں سے دو افراد کو جلد ہی طبی امداد دے کر جہاز پر دوبارہ منتقل کر دیا گیا تھا البتہ بعدازاں ان کی جانب سے پناہ کی درخواست کے بعد انہیں جہاز سے اتار لیا گیا۔ جبکہ تیسرا شخص ہسپتال میں ہی زیرِ علاج رہا اور اب اس کی زندگی خطرے سے باہر ہے“
لاس پالمس سے سرکاری حکام کا کہنا ہے کہ ان تینوں نائجیرین افراد نے اسپین میں پناہ کی درخواست دی ہے
اسپین کے قانون کے مطابق جیسے ہی اپنے ملک سے بھاگ کر آنے والے یہ افراد اسپین کی حدود میں داخلے اور یہاں پناہ کی درخواست دیتے ہیں، تو انہیں مفت قانونی مدد اور یہاں پناہ لینے کے حقوق حاصل ہو جاتے ہیں
کتنی مرتبہ غیر قانونی تارکین وطن بحری جہاز کے رڈر بلیڈ پر چھپ کر پہنچے ہیں؟ اس سوال کا جواب دیتے ہوئے میری ٹائم ایجنسی کا کہنا تھا ”عموماً یہاں آنے والے تارکینِ وطن اس طرح کے خطرناک طریقے سے نہیں آتے ہیں“
تاہم دوسری جانب اس طرح کے افراد کو ریسکیو کرنے والے مجاز ادارے کے مطابق اب تک رواں برس میں اس طرح کے پانچ واقعات سامنے آ چکے ہیں
جنوری 2018 میں میری ٹائم ریسکیو ایجنسی نے ایسے چار غیر قانون تارکینِ وطن کو بچایا تھا، جو ’گرین اسکائی‘ نامی بحری جہاز کے رڈر بلیڈ میں چھپ کر اسپین پہنچنے کی کوشش کر رہے تھے
اکتوبر 2020ع میں چار غیر قانونی تارکینِ وطن کو لاؤس سے لاس پالمس آنے والے ناروے کے آئل ٹینکر کے وہیل ہاؤس سے برآمد کیا گیا تھا
اسی ماہ ریسکیو ایجنسی نے سات افراد کو انڈرومیڈا نامی جہاز کے نچلے حصے سے بچایا تھا
جبکہ 2020ع میں نومبر کے مہینے میں اسی جہاز کے رڈر بلیڈ سے ایک اور غیر قانونی تارک وطن کو بچایا گیا، جبکہ اسی ماہ اوشن پرنسز نامی جہاز میں چھپے چار مزید تارکینِ وطن کو پکڑا گیا تھا
غیر سرکاری تنظیم کیمینینڈو فرونٹیراس اس بات پر زور دیتی ہے کہ ’کیناری آئی لینڈز روٹ‘ کے نام سے جانا جانے والے بحری راستہ پر سب سے زیادہ غیر قانونی تارکین وطن جہازوں میں چھپ کر پرخطر حالات میں سفر کرتے ہیں
اس غیر سرکاری تنظیم کے مطابق سنہ 2022ع کے پہلے چھ ماہ کے دوران اس بحری راستے میں آٹھ سو افراد کی موت ہوئی تھی
جبکہ اقوام متحدہ کی تارکینِ وطن کی عالمی تنظیم کے مطابق سنہ 2021 میں اس بحری راستے میں 1532 غیر قانونی تارکین وطن کی اموات ہوئی تھیں۔
