حال ہی میں ایک امریکی فرم ہنڈن برگ ریسرچ نے اڈانی گروپ پر اپنے حصص اور کھاتوں میں ہیرا پھیری کے ذریعے کارپوریٹ ورلڈ کا سب سے بڑا فراڈ کرنے کا انکشاف کیا، جس کے بعد گروپ کے مالک بھارت کی معروف کاروباری شخصیت اور کچھ روز قبل تک ایشیا کے امیر ترین شخص گوتم اڈانی کی ساکھ میں تنزلی کا سلسلہ تیزی سے جاری ہے
106 صفحات پر مشتمل اس رپورٹ میں یہ بھی کہا گیا ہے کہ اڈانی گروپ قرض میں ڈوبا ہوا ہے اور دعویٰ کیا ہے کہ اس کے حصص کی قیمت ان کی اصل قدر کے مقابلے میں زیادہ ہے
اس رپورٹ کے منظر عام پر آنے کے بعد سے اڈانی گروپ نے اندازے کے مطابق اڈانی گروپ کو ایک سو ارب ڈالر کے قریب کاروباری نقصان کا سامنا ہے۔ اڈانی گروپ کے چیئرمین اور بانی گوتم اڈانی کو ذاتی طور پر بھی اربوں ڈالر کا نقصان ہوا ہے۔ تاہم وہ اب بھی دنیا کے امیر ترین آدمیوں میں سے ایک ہیں اور اپنے گہرے سیاسی روابط کو برقرار رکھے ہوئے ہیں
واضح رہے کہ ہنڈن برگ ریسرچ کسی بھی کمپنی طرف سے اپنے حصص کی قیمتوں میں ہیرا پھیر ی کی نشاندہی کرنے کے لیے فرانزک مالیاتی تحقیق میں مہارت رکھتی ہے
یہاں یہ بات بھی قابل ذکر ہے کہ اس ریسرچ فرم نے 2020ع میں وال اسٹریٹ کی توجہ الیکٹرک وہیکل بنانے والی کمپنی نیکولا کارپوریشن کے بارے میں سنگین سوالات اٹھانے پر مبذول کرائی، جو اس کی ٹیکنالوجی کو غلط طریقے سے پیش کر رہی ہے۔ بعد میں ایک عدالت نے نکولا کے بانی کو دھوکہ دہی کا مجرم پایا
اڈانی گروپ نے ہنڈن برگ کی تحقیقی رپورٹ کے جواب میں چار سو تیرہ صفحات پر مشتمل اپنا جواب جاری کیا اور اس ریسرچ فرم کے الزامات کو ’بے بنیاد اور خود بھارت کے خلاف حملے‘ کے طور پر پیش کیا
اپنے ایک بیان میں اڈانی گروپ کا کہنا تھا ”یہ محض کسی مخصوص کمپنی پر غیر ضروری حملہ نہیں ہے بلکہ بھارت، بھارتی اداروں کی آزادی، سالمیت اور معیار اور بھارت کی ترقی کی کہانی اور خواہشات پر ایک نپا تُلا حملہ ہے‘‘
ہنڈن برگ نے اس کا دیتے ہوئے کہا ”دھوکہ دہی کو قوم پرستی سے پھولے ہوئے ردعمل سے چھپایا نہیں جا سکتا۔ اس رد عمل میں ہر اہم الزام کو نظر انداز کیا گیا ہے“
ادہر منگل کو راشٹریہ جنتا دَل (آر جے ڈی) پارٹی کے رکن پارلیمنٹ منوج جاہ نے اپنے ایک پیغام میں کہا ”اڈانی بھارت نہیں ہے۔ یہ تشویشناک بات ہے کہ ایک گروپ جس کے خلاف سنگین الزامات لگائے گئے ہیں، وہ بھارتی پرچم کا استعمال کر رہا ہے اور وہ یہ کہنے کی جرأت رکھتا ہے کہ کمپنی کی رپورٹ بھارت پر حملہ ہے۔ پارلیمنٹ کو اس پر بحث کرنے اور بھیجنے کی ضرورت ہے‘‘
انڈین نیشنل کانگریس (آئی این سی) کے رہنما منیش تیواری نے اپنی ایک ٹویٹ میں سوال اٹھایا، ”اڈانی کب سے بھارت بن گیا؟‘‘
اڈانی گروپ اور ‘میک ان انڈیا‘
اڈانی گروپ کا کاروبار دنیا بھر کے ممالک میں توانائی سے لے کر نقل و حمل اور بنیادی ڈھانچے کی ترقی کی کئی کمپنیوں پر مشتمل ہے
فنانسنگ اور بندرگاہوں، سڑکوں، ریل، ہوائی اڈوں اور بجلی کے بنیادی ڈھانچے کی تعمیر کے ذریعے اڈانی گروپ وزیر اعظم نریندر مودی کے تحت ہندوستان کے اقتصادی عزائم کے لیے اہم ہے
یہ گروپ مودی کے اقدامات جیسا کہ ’میک ان انڈیا‘ اور ’ڈجیٹل انڈیا‘ کا بڑا حامی رہا ہے۔ خاندانی ملکیت والے اڈانی گروپ کے حکمران سیاسی طبقے سے بھی قریبی تعلقات ہیں اور بھارتی بینکوں خاص طور پر اسٹیٹ بینک آف انڈیا اور لائف انشورنس کارپوریشن آف انڈیا سے قرضوں تک اس کی رسائی نے بڑے پیمانے پر اس جماعت کے ترقی کے حصول کے لیے مالی اعانت فراہم کی ہے
ہندوستانی ماہر اقتصادیات ارون کمار کہتے ہیں ”یہ رپورٹ مختصر مدت کے لیے اڈانی کے کاروبار اور بھارت میں غیر ملکی ادارہ جاتی سرمایہ کاروں کی دلچسپی کو متاثر کر سکتی ہے۔ بڑا سوال یہ ہے کہ اس سے مودی کی شبیہ پر کیا اثر پڑ سکتا ہے اور وہ آنے والے ہفتوں میں موجودہ تنازعہ کو کیسے ختم کرتے ہیں۔ کیا وہ خود کو (اڈانی) سے دور کر لیں گے؟‘‘
گزشتہ اگست میں کاروباری گروپوں کی ریٹنگ سے متعلق فرم کریڈٹ سائٹس کی طرف سے شائع کی گئی، ایک رپورٹ میں دعویٰ کیا گیا تھا کہ اڈانی گروپ موجودہ اور نئے کاروباروں میں جارحانہ انداز میں سرمایہ کاری کر رہا ہے اور وہ بنیادی طور پر ان سرمایہ کاری کو قرض کے ساتھ فنڈز فراہم کر رہا ہے
اس رپورٹ میں انتباہ کہا گیا ہے کہ اڈانی کی ترقی کی حکمت عملی اس کے قرض کے طریقہ کار اور نقد رقم کے بہاؤ پر دباؤ ڈال رہی ہے اور ”بدترین صورت حال میں‘‘ یہ گروپ قرض کے جال میں پھنس سکتا ہے اور ممکنہ طور پر ڈیفالٹ ہو سکتا ہے
بھارت کے نیشنل انسٹیٹیوٹ آف پبلک فنانس اینڈ پالیسی کی سربراہ پروفیسر لیکھا چکرورتی نے کہا ”میں اڈانی کی آف شور ٹیکس پناہ گاہوں کے نامناسب استعمال کے ان الزامات کے بارے میں ریزرو بینک آف انڈیا اور ریگولیٹری سیکیورٹیز ایکسچینج بورڈ آف انڈیا دونوں کے بیانات کا انتظار کر رہی ہوں‘‘
لیکھا چکرورتی کا کہنا تھا ”نامناسب سودے درحقیقت معاشی عدم مساوات کو بڑھاتے ہیں اور یہ یقینی طور پر سنگین تشویش کا باعث ہے اور اس کی مستند تحقیقات کی ضرورت ہے۔ اس طرح کے معاملات میں ‘اخلاقی‘ اور ‘جائز‘ کیا ہے کے درمیان فرق کی باریکیوں کو سمجھنے کی ضرورت ہے۔“
