خون کا عطیہ کرنا انسانیت کے لیے کی جانے والی عظیم خدمات میں سے ایک ہے۔ دنیا بھر میں ہزاروں افراد ہر روز انسانی زندگیوں کو بچانے کے لیے خون عطیہ کرتے ہیں۔
اسی سلسلے میں ایک اَسی سالہ کینیڈین خاتون کا تذکرہ بھی خبروں میں آ رہا ہے، جنہوں نے اپنی زندگی میں مجموعی طور پر 96 لیٹر یعنی 203 یونٹ خون عطیہ کیا ہے
این ڈی ٹی وی کے مطابق اَسی سالہ جوزفین میچالُوک نامی خاتون نے اپنی زندگی میں اب تک 203 یونٹ خون کا عطیہ کیا ہے، جس سے بے شمار افراد کی جان بچی ہے جو کہ ایک نیا ورلڈ ریکارڈ ہے
جوزفین گذشتہ چھ دہائیوں سے باقاعدگی سے خون کا عطیہ کر رہی ہیں۔ انہوں نے 1965ع میں بائیس سال کی عمر سے خون کا عطیہ کرنا شروع کیا
جوزفین میچالُوک کے اس ورلڈ ریکارڈ کی سماجی رابطوں کی ویب سائٹ ٹوئٹر پر گنیز ورلڈ ریکارڈز نے تصدیق کر دی ہے
گینز ورلڈ ریکارڈز نے اپنی ٹویٹ میں لکھا ہے ”جوزفین کو مبارک ہو، جنہیں زندگی میں سب سے زیادہ خون عطیہ کرنے کا ایوارڈ دیا گیا ہے“
جوزفین میچالُوک نے بتایا کہ اُن کی بہن نے سب سے پہلے اُن سے خون عطیہ کرنے کے بارے میں بات کی
وہ کہتی ہیں ”میں نے فیصلہ کیا کہ میں اس کے ساتھ مل کر خون کا عطیہ کروں گی اور یہیں سے اس کا آغاز ہوا۔ مجھے محسوس ہوتا ہے کہ میرے اندر خون ہے جو میں نے عطیہ کرنا ہے۔ میں اُن لوگوں کو عطیہ کرنا چاہتی ہوں جنہیں اِس کی ضرورت ہے“
اَسی سال کی عمر ہونے کے باوجود ورلڈ ریکارڈ ہولڈر جوزفین خون کا عطیہ کر رہی ہیں، کیونکہ امریکہ میں خون عطیہ کرنے کے لیے عمر کی کوئی حد نہیں ہے اور انسان جب تک صحتمند رہتا ہے، تب تک خون دے سکتا ہے
جوفین ابھی بھی ہر سال اوسط چار مرتبہ خون عطیہ کرتی ہیں۔ وہ چاہتی ہیں کہ مزید لوگ اُن سے متاثر ہو کر خون کے عطیات کریں
وہ کہتی ہیں ”میں نے کبھی نہیں سوچا تھا کہ میں ریکارڈ بناؤں گی۔ میں اِس غرض سے عطیہ نہیں کرتی تھی اور میرا ارادہ ہے کہ میں مزید خون عطیہ کرتی رہوں گی“
اَسی سالہ خاتون کا بلڈ گروپ او پازیٹیو ہے، جس کی ہسپتالوں میں بہت ضرورت ہوتی ہے۔امریکی ریڈ کراس کے مطابق امریکہ کی 37 فیصد آبادی کا بلڈ گروپ او پازیٹیو ہے
خیال رہے اس سے قبل خواتین میں یہ ریکارڈ بھارت کی مادھورا اشوک کمار کے پاس تھا، جنہوں نے اپنی زندگی میں 117 یونٹ خون عطیہ کیا ہے۔
