ابوظبی سے تعلق رکھنے والے چار سالہ سعید رشید المہیری نے کتاب لکھنے والے دنیا کے کم عمر ترین مصنف بننے کا اعزاز حاصل کر لیا ہے
گینز بک آف ورلڈ ریکارڈ کی ویب سائٹ کے مطابق چار سالہ بچے نے The Elephant Saeed and the Bear کے نام سے کتاب لکھی ہے، جس کی 9 مارچ 2023 کو ایک ہزار کاپیاں فروخت ہو چکی ہیں
سعید رشید المہیری دنیا کا کم عمر ترین مصنف ہے، جس نے کتاب لکھ کر سب کو حیران کر دیا ہے، اس کی عمر چار سال 218 دن ہے
سعید رشید کی لکھی کتاب دو جانوروں کی لازوال دوستی اور رحم دلی پر مبنی کہانی ہے
سعید رشید نے اپنی بڑی بہن الذہبی کے کارنامے سے متاثر ہو کر یہ کتاب لکھی تھی
واضح رہے کہ سعید کی بہن الذہبی آٹھ سال کی عمر میں دو زبانوں میں کتاب لکھ کر دنیا کی کم عمر ترین مصنفہ کا ریکارڈ اپنے نام کر چکی ہیں
سعید کی بہن نے بچوں کے لیے ایک منفرد کتاب لکھنے کا اقدام شروع کیا، اس کا مقصد چار سے دس سال کی عمر کے بچوں کو عربی یا انگریزی میں لکھنے کی ترغیب دینا ہے
سعید کا کہنا ہے ”میں اپنی بہن کے بہت قریب ہوں، ہم دونوں ساتھ مل کر پڑھتے، لکھتے، اور دیگر سرگرمیاں کرتے ہیں، میں نے اپنی بہن سے متاثر ہو کر اپنی کتاب لکھی ہے“
سعید نے کتاب کے حوالے سے کہتے ہیں ”میری کتاب کی کہانی ہاتھی اور ریچھ کے بارے میں ہے، ہاتھی ایک پکنک میں جاتا ہے اور اسی دوران اسے ریچھ دکھائی دیتا ہے، ہاتھی سوچتا ہے کہ ریچھ اسے کھا جائے گا لیکن آخر میں ہاتھی مہربانی کا مظاہرہ کرتا ہے اور اسے ایک ساتھ پکنک منانے کی آفر کرتا ہے اور پھر وہ دوست بن جاتے ہیں“
چار سالہ سعید نے اپنی والدہ اور بہن کی رہنمائی سے لکھنا سیکھا تھا جبکہ اسے ریاضی سے بھی بہت لگاؤ ہے اور وہ اپنی والدہ کے ساتھ ریاضی کے مسائل حل کرنا پسند کرتا ہے
سعید نے انکشاف کیا کہ یہ ان کے تحریری سفر کا ابھی آغاز ہے اور وہ پہلے ہی ایک دوسری کتاب پر کام کر رہے ہیں۔ اسے پڑھنا، لکھنا اور کہانیاں سنانا بےحد پسند ہے
سعید کے والدین کا کہنا تھا کہ انہیں اپنے بیٹے پر فخر ہے، انہوں نے بتایا کہ سعید اپنی بہن کے نقش قدم پر چلا ہے، اور اس کی کامیابی اس بات کا ثبوت ہے کہ ہر بچہ کسی نہ کسی ٹیلنٹ کے ساتھ پیدا ہوتا ہے۔
