حکومتِ بلوچستان اور ٹیک ویلی کے درمیان ایک ہزار نوجوانوں کو گوگل کے تعاون سے تربیت دینے کے لیے اسکالرشپس دینے کا معاہدہ طے پایا ہے
اعلامیے کے مطابق حکومت بلوچستان اور آئی ٹی فرم ٹیک ویلی کے درمیان ہونے والے معاہدے کا مقصد نوجوانوں کو جدید دور کے تقاضوں کے مطابق تعلیم دلانے اور روزگار کے نئے مواقع تلاش کرنے میں مدد فراہم کرنا ہے
حکومت بلوچستان اور ٹیک ویلی کے درمیان 5 اپریل کو ایک معاہدے پر دستخط کیے گئے، جس کے تحت صوبے کے نوجوانوں کو ٹیک ویلی گوگل کے اشتراک سے مجموعی طور پر پانچ لاکھ ڈالرز مالیت کی اسکالرشپس فراہم کی جائیں گی
اس پروگرام کے تحت تربیت مکمل کرنے والے امیدواروں کو گوگل کیریئر سرٹیفکیٹس دیے جائیں گے
ٹیک ویلی پاکستان کے مطابق یہ ٹیک ویلی اور حکومتِ بلوچستان کے درمیان پہلا معاہدہ ہے، جس میں محکمہِ کالجز، محکمہِ ہائر اینڈ ٹیکنیکل ایجوکیشن، محکمہِ تعلیم، محکمہِ سائنس انفارمیشن اینڈ ٹیکنالوجی، محکمہِ لیبر اینڈ مین پاور، محکمہِ انڈسٹریز اینڈ کامرس اور محکمہِ صحت کے ساتھ شراکت داری شامل ہے
ٹیک ویلی پاکستان کی جانب سے جاری کردہ اعلامیے کے مطابق گوگل کیریئر سرٹیفکیٹس پروگرام دہائیوں کا تجربہ رکھنے والے گوگل ملازمین کے ذریعے سکھایا اور تیار کیا جاتا ہے
سیکریٹری اطلاعات بلوچستان حمزہ شفقات کا کہنا تھا ”ہمارا مقصد بلوچستان کے نوجوانوں کو جدید ترین ڈجیٹل ٹولز اور سرٹیفیکیشن تک رسائی فراہم کر کے ان کو ترقی دینا ہے“
اس منصوبے کے تحت پراجیکٹ مینجمنٹ، یو آئی / یو ایکس ڈیزائن، ڈجیٹل مارکیٹنگ اور ای کامرس، سپورٹ اور آٹومیشن، ڈیٹا اینالیٹکس اور سائبر سکیوریٹی جیسے کام کے لیے تیار مہارتوں میں سرٹیفکیشنز کے لیے وظائف فراہم کیے جائیں گے
چیف سیکریٹری بلوچستان عبدالعزیز عقیلی نے معاہدے کے بعد ذرائع ابلاغ کو بتایا ”یہ ڈجیٹل دور ہے اور ہم نے ٹیک ویلی کو بلوچستان میں دفتر قائم کرنے کا بھی کہا ہے، جس سے نوجوانوں کوگھر بیٹھے روزگار کے مواقع بھی ملیں گے۔ نوجوانوں کو جدید ٹیکنالوجی سے ہمکنار کرنا انتہائی ضروری ہے تاکہ ان کا فوکس درست سمت کی طرف ہو۔“
عبدالعزیز عقیلی کا کہنا تھا ”وفاقی سطح پر گوگل اور ٹیک ویلی کے تعاون سے ’اسکول آن ویلز‘ کا منصوبہ بھی شروع کیا جارہا ہے، جس کے تحت بلوچستان کی حکومت دس بسیں فراہم کرے گی، جن سے ٹیکنالوجی بیسڈ اسکول قائم کیے جائیں گے۔ یہ بسیں صوبے کے مختلف علاقوں میں جا کر بچوں کو تعلیم دیں گی“
ان کا مزید کہنا تھا کہ ٹیک ویلی پاکستان کے منصوبوں سے شعبہِ تعلیم ، آئی ٹی، لیبر اور انڈسٹریز اس سے استفادہ کر سکتے ہیں۔
کیا۔
یہ پاکستان کا تیسرا صوبہ ہے جہاں گوگل کی جانب سے یہ منصوبہ شروع کیا جا رہا ہے اور اسے رواں ماہ گوگل کیرئیر سرٹیفیکیشن کے لیے وظائف دیے گئے ہیں۔ اس سے قبل COLLABS کے تعاون سے خیبرپختونخوا کے نوجوانوں کو پانچ ہزار وظائف دیے جا چکے ہیں اور گوگل نے سندھ کے نوجوانوں میں وظائف بھی تقسیم کیے ہیں۔ گوگل کا یہ پروگرام جامع ہے اور خواتین اور خصوصی صلاحیتوں کے حامل افراد کو مساوی مواقع فراہم کرتا ہے۔
