مصنوعی ذہانت یعنی آرٹیفیشل انٹیلیجنس نے ساری دنیا کو ورطہِ حیرت میں ڈال رکھا ہے۔ مصنوعی ذہانت کے حوالے سے ابھی بہت کچھ سامنے آنا باقی ہے۔ بس یہ سمجھ لیں کہ آنے والے برسوں میں لاکھوں ایسے روزگار ہیں جن پر انسانوں کی جگہ مصنوعی ذہانت کا قبضہ ہوجائے گا
موقر عربی میگزین ’سیدتی‘ نے مصنوعی ذہانت کے ایک ایسے فیچر کے بارے میں معلومات دی ہیں جو ’جی میل‘ ایپ میں فراہم کردی گئی ہے جس کے ذریعے ای میل میں بہت آسانی کے ساتھ خط وکتابت کی جا سکتی ہے
گوگل نے منصوعی ذہانت کا استعمال کرتے ہوئے اپنی ایپ پر انگلش میں لیٹر رائیٹنگ کی سہولت ’گوگل ورک اسپیس لیب‘ کے ذریعے فراہم کی ہے
’سپورٹ ڈاٹ گوگل‘ ویب سائٹ کے مطابق اب آپ جی میل کے ’ہیلپ می رائٹ‘ بٹن کے ذریعے کوئی بھی مضمون بآسانی انگریزی میں تحریر کرسکتے ہیں۔ تحریر کیا جانے والا مضمون ’سالگرہ‘ کا ہو یا شادی کی سالگرہ یا کسی سرکاری ادارے کو درخواست لکھنی ہو، اب یہ تمام کام مصنوعی ذہانت کے ذریعے منٹوں میں ہوجائے گا
تاہم گوگل کا کہنا ہے کہ ’ورک اسپیس لیب‘ پروگرام کے ذریعے کی جانے والی تحریر پر فوری طور پر اور مکمل بھروسہ نہیں کیا جا سکتا۔ خاص کر اگر تحریر کیا جانے والا مضمون صحت، قانونی یا مالیاتی مسائل کے حوالے سے ہو
پروگرام میں بعض خامیوں کی جانب سے اشارہ کرتے ہوئے کہا گیا ہے کہ مذکورہ پروگرام سے تحریر کیے جانے والے مضمون میں مکمل طور پر درست معلومات نہیں ہوتی، اسی لیے یہ لازمی ہے کہ سامنے آنے والے تحریر کو متعدد بار پڑھ کر اسے بھیجنے سے قبل درست کیا جانا لازمی ہے
اس ٹیکنالوجی سے درست طور پر فائدہ اٹھانے کے لیے ضروری ہے کہ درج ذیل نکات پر غور کر لیا جائے:
1۔ اپنی ذاتی اور خفیہ معلومات قطعی طور پر درج نہ کی جائیں
2۔ موضوع پر تحریر لکھوانا مقصود ہو تو اس کا عنوان منتخب کریں
3۔ پروگرام شروع کرنے سے قبل ’گوگل ورک اسپیس لیب‘ کی شرائط و ضوابط پڑھ لیں
4۔ سامنے آنے والی تحریر کو متعدد بار پڑھ لیں اور بھیجنے سے قبل تمام غلطیوں کو درست کر لیں
5۔ ایک مسودہ تیار کریں، جس میں مضمون اور اس کے طریقہ کار کے علاوہ جسے بھیجا جانا ہے، اس کے بارے میں بھی معلومات فراہم کریں
6۔ مسودہ تحریر کرنے کے بعد سامنے آنے والی تحریر کا جائزہ لیں اور اپنے نوٹس درج کریں تاکہ اس پروگرام کو مزید بہتر بنایا جا سکے
7۔ مصنوعی ذہانت کے ذریعے سامنے آنے والی تحریر کا جائزہ لیں اور جہاں کمی و بیشی محسوس کریں اسے درست کر لیں
مصنوعی ذہانت سے نیا مسودہ کیسے تحریر کریں؟
جی میل ایپ کھولیں اور اسکرین کے بائیں جانب نیچے کی طرف ’کریٹ‘ کو کلک کریں
محض ایک کلک سے آپ ڈاک میں موصول ہونے والے خط کا جواب دے سکتے ہیں، جس کے لیے ’مدد‘ کے آئیکون میں ’ہیلپ می رائیٹ ‘ تحریر کر کے اسے سینڈ کر دیں۔
