کورونا وائرس کی تیسری لہر کے پیش نظر تعلیمی اداروں کی بندش کے حوالے سے اہم اعلان کر دیا گیا ہے، اعلان کے مطابق زائد کیسز والے اضلاع میں 11 اپریل تک تعلیمی ادارے بند رہیں گے
اسلام آباد میں پریس کانفرنس کے دوران وفاقی وزیر تعلیم شفقت محمود نے کہا کہ سندھ ،بلوچستان اور گلگت بلتستان میں کورونا کی شدت کم ہے، لاہور سمیت پنجاب کے چند اضلاع میں کورونا کا پھیلاؤ تشویش ناک ہے، خیبرپختونخوا کے کچھ اضلاع میں بھی کورونا کا پھیلاؤ ہے، 11 اپریل تک مخصوص اضلاع میں تعلیمی ادارے مزید بند رہیں گے۔ کن اضلاع میں تعلیمی ادارے بند کرنے ہیں یہ فیصلہ صوبائی حکومتیں کریں گی
وفاقی وزیر نے کہا کہ لاہور، راولپنڈی، گوجرانوالہ، گجرات، ملتان، فیصل آباد، سیالکوٹ، سرگودھا اور شیخوپورہ میں تعلیمی ادارے بند رہیں گے۔ پنجاب کے دیگر اضلاع میں پرانے شیڈول کے مطابق اسکول کھلیں گے۔ قانون کی خلاف ورزی کرنے والے اسکول سیل کر دیے جائیں گے
شفقت محمود نے دہرایا کہ کورونا کے پیش نظر گزشتہ برس نویں، دسویں، گیارہویں اور بارہویں کے امتحانات نہیں ہوئے تھے تاہم اس بار ایسا نہیں ہوگا۔ نویں تا بارہویں امتحانات شیڈول کے مطابق مئی کے آخر میں ہوں گے۔ کیمبرج نظام تعلیم کے امتحانات جلد شروع ہو رہے ہیں، صورتحال کا جائزہ لینے کے لئے کیمبرج کے ساتھ میٹنگ کریں گے
پریس کانفرنس سے قبل این سی او سی کا اجلاس ہوا۔ جس میں وزرائے تعلیم، صحت اور دیگر متعلقہ حکام شریک ہوئے، اجلاس کے دوران اسلام آباد کے تعلیمی اداروں کو مزید کچھ روز بند رکھنے کی تجویز دی گئی۔ این سی او سی نے پنجاب کے 10 اضلاع میں تعلیمی ادارے 11 اپریل تک بند کرنے کا فیصلہ کیا
ادہر سندھ کے صوبائی وزیر تعلیم سعید غنی کا کہنا ہے کہ صورتحال خراب ہوئی تو اسکول بند کرنے پر غور کیا جا سکتا ہے
وزیر تعلیم سعید غنی نے کہا کہ صوبہ سندھ میں کورونا کی صورتحال زیادہ خراب نہیں ہے، صوبے میں اسکول بند کرنے کا تاحال کوئی فیصلہ نہیں کیا، اگر صورتحال خراب ہوئی تو اسکول بند کرنے کا سوچا جا سکتا ہے
دوسری وزیر تعلیم خیبر پختونخوا شہرام خان تراکئی نے اپنی ٹوئٹ میں کہا ہے کہ کورونا سے متاثرہ کے خیبر پختونخوا کے 9 اضلاع میں تمام تعلیمی ادارے 11 اپریل 2021ع تک بند رکھے جائیں گے، جن میں پشاور، مردان، چارسدہ، صوابی، ملاکنڈ، سوات، نوشہرہ اور بونیر شامل ہیں.
