ٹوکیو : جاپان میں ہونے والے ٹوکیو اولمپکس 2020 کی افتتاحی تقریب کے ڈائریکٹر، کینتارو کوبایاشی کو برطرف کردیا گیا ہے کیونکہ انہوں نے آج سے تیس سال پہلے 1990ع کے عشرے میں ہولوکاسٹ کا مذاق اُڑایا تھا
برطرفی کا یہ اعلان آج صبح اولمپکس 2020 کے صدر سیکو ہاشیموتو نے ایک میڈیا بریفنگ میں کیا
سیکو ہاشیموتو نے اعلان میں کہا کہ کوبایاشی نے 1990 کے عشرے میں ایک پروگرام کے دوران مزاحیہ انداز سے تبصرہ کرتے ہوئے ہولوکاسٹ کا مذاق اڑایا تھا جس کی وجہ سے انہیں برطرف کیا جا رہا ہے
واضح رہے کہ دوسری عالمی جنگ میں نازی جرمنوں کے ہاتھوں یہودیوں کی نسل کشی کو ’’ہولوکاسٹ‘‘ کہا جاتا ہے جس میں یہودیوں کے دعوے کے مطابق اندازاً ساٹھ لاکھ یہودی قتل کیے گئے تھے
اگرچہ کینتارو کوبایاشی نے اپنے مذکورہ تبصرے کو ’’لفظوں کا احمقانہ انتخاب‘‘ قرار دیتے ہوئے اس پر معافی مانگ لی تھی لیکن یہودیوں کی عالمی تنظیموں نے یہ معافی قبول نہیں کی تھی
یہی وجہ ہے کہ ٹوکیو اولمپکس 2020 کی افتتاحی تقریب کےلیے کوبایاشی کی بطور سربراہ تقرری کو عالمی یہودی حلقوں میں شدید ناپسندیدگی کی نگاہ سے دیکھا جارہا تھا
یہودی حقوق کی عالمی تنظیم سائمن ویزنتہال سینٹر نے خبردار کیا تھا کہ وہ اولمپکس میں کسی ایسے عہدیدار کو برداشت نہیں کرے گی جو ماضی میں ہولوکاسٹ کو مذاق کا نشانہ بنا چکا ہو
عالمی یہودی احتجاج کے باعث ٹوکیو اولمپکس 2020 کی انتظامی کمیٹی نے افتتاحی تقریب کے ’’متنازعہ سربراہ‘‘ کو برطرف کردیا ہے تاکہ دنیا بھر میں موجود یہودیوں کی دل آزاری نہ ہو۔
