کراچی : اٹلس ہونڈا نے اپنی مقبول ترین موٹر سائیکل سی ڈی 70 کا 2022 کا نیا ماڈل پاکستان میں متعارف کرا دیا ہے
تفصیلات کے مطابق پاک وہیلز کی رپورٹ میں بتایا گیا ہے کہ کمپنی کا دعویٰ ہے کہ اس مرتبہ نئے ماڈل میں صرف اسٹیکرز کو ہی تبدیل نہیں کیا گیا بلکہ فریم اور انجن میں بھی کئی تبدیلیاں کی گئی ہیں. کمپنی کے دعوے کے مطابق اس نئی موٹر سائیکل میں ایک سو ایک تبدیلیاں کی گئی ہیں، جن میں نئے اسٹیکرز، ماحول دوست سِیٹ اور ہائی پرفارمنس انجن قابل ذکر ہیں
رپورٹ کے مطابق نئی سی ڈی 70 کے انجن میں 43 جبکہ فریم میں 58 تبدیلیاں کی گئی ہیں۔ ان میں سے ایک بڑی تبدیلی لو فریکشن پسٹن رنگز کی ہے اور پہلی مرتبہ ان رنگز کو کرومیم نائٹرائیڈ سے تیار کیا گیا ہے تاکہ انجن کی کارکردگی کو بہتر بنایا جا سکے
اسی طرح ہائر کمپریشن ریشو بائیک کا حصہ ہے جس سے انجن زیادہ درجہ حرارت کے خلاف مزاحمت کرسکتا ہے
موٹر سائیکل میں نئی کلچ اسمبلی کا اضافہ بھی کیا گیا ہے جس سے بائیک کا کلچ فریکشن بہتر ہوا ہے۔
ماحول دوست نشست کے ساتھ نئے پرکشش اسٹیکرز بھی اس موٹر سائیکل کا حصہ ہوں گے
سرخ رنگ کی موٹر سائیکل پر سبز، پیلے اور گرے رنگوں کے اسٹیکرز ہوں گے جبکہ بلیک سی ڈی 70 میں پیلے، گولڈن اور گرے رنگوں کے اسٹیکرز کا استعمال کیا گیا ہے
ویسے دیکھنے میں اس نئی موٹر سائیکل کا ڈیزائن پرانے ماڈلوں سے کچھ زیادہ مختلف نظر نہیں آتا، کہ جسے دیکھ کر کوئی واضح تبدیلی محسوس ہو
اس موٹر سائیکل میں 4 اسٹروک او ایچ سی ایئر کولڈ انجن موجود ہوگا جبکہ اس کا وزن 82 کلوگرام ہوگا
موٹر سائیکل کے ٹینک میں ساڑھے 8 لیٹر پیٹرول بھرا جاسکتا ہے جبکہ 4 اسپیڈ ٹرانسمیشن موڈز موجود ہیں
کمپنی نے اس نئی موٹرسائیکل قیمت 86 ہزار 900 روپے رکھی ہے.
