کراچی – برطانیہ کے سوئنڈن فٹبال کلب کے کوچ ایلکس پائیک ان دنوں کراچی میں ہیں، جہاں وہ ایم سی فٹ بال کلب کے گراؤنڈ میں لیاری کے پندرہ سال سے کم عمر تین سو بچوں کی کوچنگ کر رہے ہیں
ان بچوں کے درمیان بعد میں مقابلے کرائے جائیں گے اور آخر میں انہی بچوں میں سے پچیس بہتر کارکردگی دکھانے والے بچوں کو سوئنڈن فٹ بال کلب کی اسکالرشپ پر کراچی سے سوئنڈن ٹاؤن لے جایا جائے گا
ایلکس پائیک نے اس حوالے سے بتایا کہ کراچی کے لیاری ٹاؤن میں فٹبال ایک مقبول کھیل سمجھا جاتا ہے۔ یہاں بچے اور نوجوان گلی میں فٹبال کھیلتے ہیں۔ یعنی یہ سٹریٹ فٹبال کھلاڑی ہیں۔ جو بہت تیز، باصلاحیت اور چیلینج قبول کرنے والے ہوتے ہیں
ایلکس نے کہا ”جن بچوں کی ہم تربیت کر رہے ہیں، یہ فٹبال کے کھیل کو بے حد پسند کرتے ہیں۔ فٹبال سے ان کی محبت کو دیکھ کر میں بہت متاثر ہوا ہوں“
وہ کہتے ہیں ”اگرچہ یہ بچے بہترین کھیلتے ہیں مگر ان کو تربیت کی ضرورت ہے۔ جب سے ہم نے ان کی ٹریننگ شروع کی ہے، یہ بچے انتہائی زیادہ دلچسپی لے رہے ہیں۔ جب میں بات کرتا ہوں یا دوسرے کوچ بات کرتے ہیں، تو یہ غور سے سنتے ہیں۔ ایسا لگتا ہے کہ وہ کھیل اور جو کچھ کر رہے ہیں، اسے پسند کرتے ہیں“
ایلکس پائیک کے مطابق ان تین سو بچوں میں سے پچیس کو اسکالرشپ دی جائے گی اور ساتھ ہی ساتھ فٹبال کوچز کے لیے بھی ایک اسکیم ہے، جس میں ابھی آٹھ کوچ آئے ہیں، ان میں دو کوچز کو اسکالرشپ پر سوئنڈن فٹ بال کلب لے جا کر پروفیسشنل تربیت دی جائے گی
انہوں نے کہا ”یہ اسکالرشپ ان بچوں کے لیے بہترین موقع ہے جس کے دوران بچے تربیت لے کر پروفیشنل فٹ بال کے کھلاڑی بن سکیں گے“
