آج کے دور میں اسمارٹ فون کا استعمال گویا ناگزیر ہو چکا ہے لیکن بہت سے اسمارٹ فونوں کی ایک بڑی خرابی یہ ہے کہ ان کی بیٹری بہت جلد ختم ہو جاتی ہے۔یہ بات اکثر موبائل فون صارفین کے لیے مشکلات کا سبب بنتی ہے۔ خوش قسمتی سے بیٹری کی زندگی بڑھانے والے طریقے موجود ہیں۔ان کے ذریعے بیٹری کی مدت استعمال خاصی بڑھ جاتی ہے، یہ طریقے سنگت میگ کے قارئین کے ساتھ یہاں شیئر کیے جا رہے ہیں
اسکرین کا استعمال
اسمارٹ فون میں سب سے زیادہ توانائی اس کی اسکرین استعمال کرتی ہے۔ لہٰذا اسکرین کی روشنی ہمیشہ کم رکھیں ۔ اس طرح آپ آئی فون پر ایک گھنٹے میں 54 فیصد جبکہ اینڈرائیڈ فون پر 30 فیصد کم بیٹری خرچ ہوگی
بیٹری چارج کے دشمن اشتہارات
ویب براؤزنگ کے وقت سمارٹ فون اشتہارات ڈاؤن لوڈ کرتے ہوئے خاصی توانائی خرچ کرتا ہے۔ چناں چہ ایڈ بلاکر انسٹال کرکے بھی آپ بیٹری کی زندگی بڑھا سکتے ہیں۔ اس حوالے سے آئی فون کے لیے 1blocker اور اینڈرائیڈ کے لیے Ghostery Privacy Browser اچھے پروگرام تصور کیے جاتے ہیں
ڈاؤن لوڈ کیے گئے وڈیو اور آڈیو
براہ راست آن لائن وڈیو اور آڈیو اسٹریمنگ سے بیٹری زیادہ پاور استعمال کرتی ہے۔ مثلا وائی فائی کنکشن پر دو گھنٹے آڈیو سننے سے دس فیصد بیٹری خرچ ہوتی ہے مگر فون کے اندر موجود آڈیو سننے پر صرف پانچ فیصد بیٹری خرچ ہوتی ہے
تھوڑی سی جاسوسی
آئی فون اور اینڈرائیڈ فونوں میں یہ دیکھنے کا طریقہ موجود ہے کہ کون سی ایپس بیٹری زیادہ خرچ کرتی ہیں۔وہ یہ بھی بتاتا ہے فون جب استعمال نہ ہو تو کون سی اپلیکشنز بیٹری خرچ کرتی ہیں۔ انہیں تلاش کرکے بیک گراؤنڈ ایکٹیوٹیز کو ڈس ایبل کردیں۔ آئی فون پر سیٹنگز ، جنرل اور پھر بیک گراؤنڈ ایپ ریفریش پر جاکر کسی بھی ایپ کو ڈس ایبل کر دیجیے ۔ اینڈرائیڈ پر سیٹنگز میں جاکر ڈیٹا یوزایج پر کلک کریں، مطلوبہ ایپ کو منتخب کریں اور پھر ’’Restrict Background Data‘‘ کو کلک کر لیں
ٹریکنگ پروگرام
بعض ایپس آپ کی لوکیشن ٹریک کرتی ہیں۔ تب فون کا جی پی ایس بہت زیادہ بیٹری استعمال کرتا ہے۔ ایک ٹریکنگ پروگرام آپ کی لوکیشن مانیٹر کرتا اور بیٹری کی سطح گرا دیتا ہے۔ لہٰذا بہتر ہے کہ ایسی ایپس کو ڈس ایبل کر دیا جائے
وائرلیس بند کر دیں
جب کسی مقام پر وائی فائی یا سیلولر کوریج اچھی نہ ہو تو بیٹری بہت تیزی سے ختم ہوتی ہے۔ وجہ یہ کہ فون اپنی توانائی اچھے سگنل کی تلاش پر خرچ کرتا ہے۔ لہٰذا بیٹری بچانے کے لیے وائی فائی موڈ بند کر دیں، اور اگر آپ بلکل استعمال نہ کر رہے ہوں تو فلائٹ موڈ آن کر لیں.
