ٹک ٹاک میں طالب علموں اور سائنس میں دلچسپی رکھنے والے افراد کے لیے ’اسٹیم‘ فیڈ متعارف کرانے کا اعلان

دنیا کی مقبول ترین شارٹ وڈیو سوشل شیئرنگ ایپلیکیشن ٹک ٹاک نے نوجوانوں، طالب علموں سمیت سائنس میں دلچسپی رکھنے والے افراد کے لیے ’اسٹیم‘ فیڈ متعارف کرانے کا اعلان کیا ہے

’اسٹیم‘ STEM چار الفاظ سائنس، ٹیکنالوجی، انجینئرنگ اور میتھ کے پہلے حروف کو ملا کر بنایا گیا ہے۔ اس فیڈ میں اب صارفین کو انہی موضوعات پر بنائی جانے والی تمام وڈیوز نظر آئیں گی

ٹک ٹاک نے اپنی بلاگ پوسٹ میں بتایا ہے کہ پلیٹ فارم پر اب تک اسٹیم کے موضوعات پر بنائی گئی وڈیوز کو ایک سو دس ارب مرتبہ دیکھا جا چکا ہے اور ’اسٹیم‘ کے ہیش ٹیگ کو بڑے پیمانے پر استعمال کیا جاتا ہے

کمپنی کے مطابق ’اسٹیم‘ کے ہیش ٹیگ کو دیکھتے ہوئے پلیٹ فارم پر اسی نام سے مواد شیئر کیے جانے کی نئی فیڈ متعارف کرائی جا رہی ہے

کمپنی کے مطابق ’اسٹیم‘ فیڈ صارفین کو دوسری فیڈز کے ساتھ ہی نظر آئیں گی، یعنی صارفین اسپورٹس، فیشن اور ڈانس کے فیڈز کے ساتھ اب اسٹیم کی فیڈ بھی دیکھ سکیں گے

ٹک ٹاک کے مطابق اسٹیم فیڈ سے دنیا بھر کے نئے سائنسدانوں اور اس میں دلچسپی رکھنے والے افراد کو ایک دوسرے کے خیالات جاننے اور دنیا کو بہتر بنانے میں مدد ملے گی

انتطامیہ نے بتایا کہ ’اسٹیم‘ فیڈ میں مواد کے معیار کو بہتر بنانے کے لیے ٹک ٹاک نے دو دیگر اداروں سے معاہدہ کیا ہے جو کہ مواد کی تفتیش کریں گے اور غلط اور گمراہ کن مواد کو پلیٹ فارم سے ہٹائیں گے

ٹک ٹاک نے ’اسٹیم‘ فیڈ کے لیے انٹرنیشنل فیکٹ چیکر تنظیم ’پوائنٹر‘ اور ’کامن سینس نیٹ ورک‘ کے ساتھ معاہدہ کیا ہے

ٹک ٹاک نے ’اسٹیم‘ فیڈ کو فوری طور پر دنیا کے چند ممالک میں متعارف کرادیا ہے، تاہم اسے جلد ہی دیگر ممالک میں بھی متعارف کرادیا جائے گا۔