ماہرینِ آثار قدیمہ نے کہا ہے کہ انہیں خلیج فارس کے ایک جزیرے میں ایک قدیم قصبے کی باقیات ملی ہیں، جہاں زیادہ تر لوگ سمندر سے موتی ڈھونڈنے کے پیشے سے منسلک تھے
’ام القیوین‘ کے جزیرے سینیہ کے اس قصبے کی باقیات سے ظاہر ہوتا ہے کہ وہاں سینکڑوں مکانات تھے، جن میں ممکنہ طور پر ہزاروں افراد رہتے تھے۔ اس قصبے کا تعلق چھٹی صدی عیسوی سے تھا۔ اسی صدی کے آخر میں اس خطے میں اسلام پھیلنا شروع ہوا تھا
عالمی خبر رساں ایجنسی ایسوسی ایٹڈ پریس کے مطابق ماہرینِ آثار قدیمہ کا کہنا ہے کہ قدیم تاریخی حوالوں میں ایسے قصبوں کا ذکر ملتا ہے، جہاں سمندر سے نکالے جانے والے موتیوں کا کاروبار ہوتا تھا، لیکن یہ پہلی بار ہے کہ متحده عرب امارات کے خلیج فارس کے علاقے میں موتیوں والے ایک قصبے کی باقیات دریافت ہوئی ہیں
متحدہ عرب امارات یونیورسٹی میں شعبہ آثار قدیمہ کے ایک ایسوسی ایٹ پروفیسر ٹموتھی پاور نے کہا ہے کہ یہ خلیجی علاقے میں موتیوں والے قدیم ترین قصبے کی دریافت کی ایک اہم مثال ہے
موتیوں کا قصبہ جزیرہ سینیہ پر واقع ہے۔ اس جزیرے کے نام کا مطلب ہے ’چمکتی ہوئی روشنیاں‘ ۔ جس کی ممکنہ وجہ یہ ہے کہ اس علاقے میں بہت پہلے ماہرینِ آثار قدیمہ نے 1400 سو سال پرانی ایک خانقاہ کی باقیات دریافت کی تھیں، جو سورج کی روشن اور گرم کرنوں میں چمک رہی تھیں۔ موتیوں کا قصبہ اس خانقاہ کے جنوب میں تقریباً چوبیس ایکڑ پر پھیلا ہوا ہے
پاور نے بتایا کہ ماہرین آثار قدیمہ نے وہاں ساحلی پتھروں اور چونے کے پلستر سے بنے مکانوں کی باقیات دریافت کیں، جن میں چھوٹے چھوٹے گھروں سے لے کر بڑی حویلیاں بھی تھیں۔ جو معاشرتی تقسیم کو ظاہر کرتی ہیں
پاور کا مزید کہنا تھا کہ ان باقیات سے ظاہرہوتا ہے کہ اس قصبے میں سال بھر رہائش رکھی جاتی تھی، جب کہ کئی دوسری جگہوں پر رہائش سال کے اس حصے میں ہوتی تھی جب وہاں سمندر سے سیپیاں اور موتی نکالنے کا کام ہوتا تھا
قصبے کے مکانوں سے آثار قدیمہ کے ماہرین کو ناپختہ حالت میں موتی اور سمندر میں ڈبکی لگانے کا سامان میں ملا ہے جس کی مدد سے وہ تیزی سے پانی کی تہہ میں پہنچ کر جلدی سے اوپر آجاتے تھے۔ کیونکہ اس عمل کے دوران انہیں اپنا سانس روک کر رکھنا پڑتا تھا
ام القیوین کے محکمہ سیاحت اور آثار قدیمہ، متحدہ عرب امارات یونیورسٹی، امارات میں اطالوی آثار قدیمہ کے مشن اور نیویارک یونیورسٹی میں قدیم دنیا کے مطالعہ کے انسٹی ٹیوٹ نے کھدائی میں حصہ لیا۔ ام القیوین اس جگہ ایک سیاحتی مرکز بنانے کا ارادہ رکھتی ہے
یاد رہے کہ ام القیوین، متحدہ عرب امارات میں شامل سب سے کم آبادی والی ریاست ہے
یہ بات بھی دلچسپی سے خالی نہیں ہوگی کہ دس ہزار سیپیوں میں سے صر ف ایک سیپی ایسی ہوتی ہے، جس کے اندر موتی موجود ہوتا ہے۔ ایک موتی ڈھونڈنے کے لیے دس ہزار سیپیوں کو کھول کر کھنگالنا بلاشبہ ایک صبر آزما کام ہے
لیکن سائنس کی ترقی نے موتیوں کے کام کو بہت آسان بنا دیا ہے کیونکہ اب زیادہ تر موتی مصنوعی طریقے سے پیدا کیے جاتے ہیں لیکن واٹر پرلز اکثر سونے سے بھی مہنگے ہیں۔
