اگر آپ کے پاس دس لاکھ امریکی ڈالر ہیں تو آپ پورا آسٹریلوی جزیرہ خرید سکتے ہیں
جی ہاں ، پول نامی نجی جزیرہ فروخت کے لیے مارکیٹ میں موجود ہے اور مالک کو امید ہے کہ انہیں جزیرے کی خریداری کے لیے نو لاکھ پچانوے ہزار آسٹریلوی ڈالر (پانچ لاکھ چالیس ہزار پاؤنڈ) سے زیادہ رقم کی پیشکش کی جائے گی
فروخت کے لیے پیش کیا گیا جزیرہ کوئنز لینڈ کے ساحل کے قریب وائٹ سنڈے جزائر سے ایک کلو میٹر کے فاصلے پر واقع ہے
اس جزیرے کا رقبہ تقریباً اکیس ہیکٹر ہے اور اس میں ایک بڑا گھر بنا ہوا ہے، جس کا رخ بحیرہِ مرجان کی طرف ہے۔ اس کے ساتھ ایک اور پرانا گھر بھی ہے، جو انیسویں صدی میں بنایا گیا تھا
جزیرے کے فروخت کے اشتہار کے مطابق آئی لینڈ میں طیاروں کے لیے سات سو فٹ طویل رن وے بنا ہوا ہے، جب کہ چٹان کو ہاتھوں سے تراش کر بنایا گیا سوئمنگ پول اضافی کشش لیے ہوئے ہے
جائیداد کی خرید و فروخت کا کام کرنے والی کمپنی پرائیویٹ آئی لینڈز آن لائن کی فہرست میں بتایا گیا ہے کہ ’پرانی عمارت کو کچھ تعمیر و مرمت کی ضرورت ہے تاہم بڑا مکان رہائش کے لیے تیار ہے‘
اشتہار کے مطابق ”اگرچہ پرانے مکان کو کسی قدر توجہ اور مرمت کی ضرورت ہے لیکن اس میں ہاتھوں سے بنائی اینٹوں کا کام اور راستے بہت اچھی حالت میں ہیں“
پرائیویٹ آئی لینڈز آن لائن کے ملازم رچرڈ وین ہوف کی طرف سے چار سال قبل یوٹیوب پر پوسٹ کی گئی ویڈیو میں پول آئی لینڈ کے چاروں طرف سمندر کا خوبصورت، چمکدار اور نیلے رنگ کا پانی دیکھا جا سکتا ہے
اس منفرد نجی جزیرے کی تاریخ کے مطابق اسے 1800 کی دہائی میں کمرشل پراپرٹی میں تبدیل کیا گیا، جس سے سوئمنگ پول میں موجود قدرتی نمکین پانی کے بارے میں پتہ چلتا ہے۔ یہاں سوئمنگ پول کو معمول کی دیکھ بھال کی ضرورت نہیں ہے
اسٹیٹ ایجنسی کے مطابق: ’سابقہ مالک نے قدرتی چٹان کو کام میں لاتے ہوئے نئے ونڈ مل پمپ کی مدد سے نمکین پانی کا سوئمنگ پول تیار کیا۔ پمپ تالاب کو مسلسل پانی فراہم کرتا ہے اور اس کی سطح برقرار رکھتا ہے۔ اس لیے سوئمنگ پول کو کیمیکل یا صفائی کی ضرورت نہیں ہوتی کیوں کہ صاف و شفاف پانی وافر مقدار میں موجود ہے۔‘
ماہی گیری میں دلچسپی رکھنے والوں کے لیے پول آئی لینڈ کا اپنا سلپ وے اور شیڈ ہیں۔ پتھروں سے بنائے گئے دوسرے شیڈ میں گاڑیاں یا مشینری رکھی جا سکتی ہیں
جزیرے کے مکین قریبی کوئنزلینڈ میں لینڈنگ کے مقامات ایئرلی بیچ یا بووین تک کا سفر کرنے یا وہاں سے جزیرے میں واپسی کے سفر کے لیے اس کے رن وے کو چھوٹے طیارے یا ہیلی کاپٹر کے لیے استعمال کر سکتے ہیں۔
