محاورہ مشہور ہے ’کلیجی کھانے کے چکر میں پورا اونٹ ہی ذبح کر دینا‘ ، جاپان میں ایک چون سالہ شخص نے بھی کچھ ایسا ہی کیا، جب انہوں نے کاکروچ مارنے کی کوشش میں غلطی سے اپنے اپارٹمنٹ کو ہی دھماکے سے اڑا دیا
ایک جاپانی روزنامہ مینیچی شمبن کی ایک رپورٹ کے مطابق، ایک جاپانی شخص کی ایک کاکروچ کو مارنے کی کوشش اس وقت خطرناک موڑ اختیار کر گئی جب کیڑے مار دوا کے زیادہ استعمال نے اس کے کماموٹو اپارٹمنٹ میں دھماکہ کر دیا
رپورٹس کے مطابق انہوں نے 10 دسمبر کو کیڑے مار دوا کا بےدریغ استعمال کیا تھا، جس سے ان کے اپارٹمنٹ میں رات کے بارہ بجے دھماکہ ہوا۔ یہ اپارٹمنٹ کیوشو نامی جزیرے میں کواموٹو میں واقع ہے، جو ہیروشیما کے جنوب مغرب میں دو سو تیس میل کے فاصلے پر ہے
جاپانی اخبار مینیچی کی رپورٹ میں بتایا گیا ہے کہ پولیس کے مطابق شخص کو معمولی نوعیت کے زخم آئے تاہم اس کے جاپانی ہیٹنگ ٹیبل کوٹاسو کے نزدیک جلنے کے نشانات پائے گئے
شہر کے علاقے چوو وارڈ میں قائم اپارٹمنٹ میں اس نامعلوم شخص نے ایک کاکروچ دیکھا اور اس کو مارنے کی غرض سے کیڑے مار دوائی کا بڑے پیمانے پر چھڑکاؤ کر دیا
کوماکوٹو پریفیکچرل پولیس کے مطابق ایک لمحے کے بعد ہی اپارٹمنٹ میں دھماکہ ہو گیا
دھماکا اس شدت سے ہوا کہ بالکونی میں کھڑکی بھی ٹوٹ گئی
جاپان کے نیشنل کنزیومر افیئرز سینٹر کو اس نوعیت کی متعدد شکایات موصول ہوتی ہیں، جن میں بجلی کے کنکشن کے آوٹ لیٹس کے قریب اسپرے کیا جاتا ہے
اسٹرئٹ ٹائمز نے رپورٹ کیا کہ مختلف کیڑے مار دوائیوں کی کمپنیوں کے مطابق بجلی کے کنکشن کے آوٹ لیٹس کے قریب سپرے کرنا خطرناک ہوسکتا ہے اور نقصان کا خدشہ رہتا ہے
یہ واقعہ سوشل میڈیا پر بہت زیر بحث رہا، جس میں بہت سے صارفین کو ان حالات میں مذاق کی سوجھی
صارفین نے مزاحیہ انداز میں کاکروچ کی قسمت کے بارے میں قیاس آرائیاں کیں اور اس کے خاتمے کے لیے اٹھائے گئے انتہائی اقدامات کے بارے میں ہلکے پھلکے تبصرے شیئر کیے
ایک سوشل میڈیا صارف نے انسٹاگرام پر پوچھا: ’لیکن سب بھی یہ سوال اپنی جگہ پر موجود ہے کہ کیا کاکروچ مر گیا؟‘
ایک صارف نے لکھا ”کاکروچ ہنستے ہوئے پڑوسیوں کے اپارٹمنٹ کی طرف فرار ہو گیا“
ایک اور صارف نے کاکروچ کو کچل کر مارنے کا طریقہ بہترین گردانا
ایک سوشل میڈیا صارف نے ایکس پر لکھا: ’کیا آپ کو یقین ہے؟ وہ (کاکروچ) اس سے بھی بدتر حالات میں زندہ بچ جاتے ہیں۔‘
کسی اور نے لکھا: ’کاکروچ زہر سے نہیں، ہنسی سے لوٹ پوٹ ہو کر مرا۔‘
یہ واقعہ امریکہ میں ایک سابقہ واقعہ کی عکاسی کرتا ہے، جہاں اوہائیو کی ایک خاتون نے 2017 میں شراب پی کر بیڈ بگز کو مارنے کی کوشش کرتے ہوئے غلطی سے اپنے گھر کو آگ لگا دی تھی۔ اس حادثے کے نتیجے میں تین افراد زخمی ہوئے اور دس افراد بے گھر ہو گئے۔
