ارتقاء ایک ایسا عمل ہے، جو لاکھوں سالوں پر محیط ہوتا ہے، جس کے ذریعے حیاتیاتی انواع وقت کے ساتھ ساتھ اپنے ماحول کے مطابق ڈھلتی ہیں۔ ارتقائی عدم مطابقت ایک ایسا نظریہ ہے، جس میں یہ کہا جاتا ہے کہ جب ماحول کی تبدیلی کی رفتار انواع کے ارتقائی ردعمل سے زیادہ ہو جاتی ہے، تو انواع کے بقا اور ترقی میں مشکلات پیش آتی ہیں۔ یہ صورتحال آج کے دور میں تیزی سے بدلتے ہوئے ماحول کی وجہ سے زیادہ واضح ہوتی جا رہی ہے۔
ارتقائی عدم مطابقت کے نظریاتی پس منظر کی بات کی جائے تو ارتقاء کا عمل بہت ہی آہستہ رفتار سے ہوتا ہے۔ انواع ہزاروں سالوں میں اپنے ماحول کے مطابق ارتقاء پاتی ہیں۔ اس کا مطلب ہے کہ ارتقاء کی رفتار عموماً ماحول کی تبدیلی کی رفتار سے میل کھاتی ہے۔ مگر جب ماحول کی تبدیلی تیزی سے ہو، جیسے کہ حالیہ صدیوں میں انسانی سرگرمیوں کی وجہ سے ہوا، تو انواع کے لیے اس رفتار سے ڈھلنا مشکل ہو گیا ہے۔ اس کو ارتقائی عدم مطابقت کہا جاتا ہے۔
اس صورتحال کو ہم درج ذیل مثالوں اور اثرات سے آسانی کے ساتھ سمجھ سکتے ہیں:
غذا اور صحت: پرانے دور میں انسان کی غذا قدرتی تھی، جو شکار اور پھل پھول پر مبنی تھی، مگر صنعتی دور کے بعد غذا میں بڑی تبدیلی آئی، جس سے موٹاپا، دل کی بیماریاں اور دیگر صحت کے مسائل پیدا ہوئے ہیں۔ انسانی جسم ابھی بھی قدیم غذائی عادات کے مطابق ہے، جبکہ موجودہ غذا اور طرزِ زندگی اس سے بہت مختلف ہے۔
ماحولیاتی تبدیلی: ماحولیاتی تبدیلی جیسے کہ درجہ حرارت میں اضافہ، آلودگی، اور جنگلات کی کٹائی یا جنگلوں میں لگنے والی آگ، صنعتی اور رہائشی مقاصد کے لیے زرعی اراضی کے سکڑنے اور زرعی ادویات کے چھڑکاؤ وغیرہ جیسے عوامل کے باعث بہت سی انواع نے اپنے مسکن بدل دیے ہیں۔ اس کی وجہ سے بہت سے جاندار اپنی بقا کے لیے درکار حالات سے محروم ہو رہے ہیں۔
شہری زندگی: شہری زندگی کی تیز رفتار اور مصنوعی ماحول نے انسان کے قدرتی ارتقائی انداز کو متاثر کیا ہے۔ شہروں میں شور، آلودگی، اور روشنی کی زیادتی نے نیند کے مسائل اور ذہنی دباؤ میں اضافہ کیا ہے۔
جیسا کہ اوپر بیان کیا جا چکا ہے کہ قدرتی انتخاب کے طویل، سست عمل کے دوران، حیاتیاتی انواع اپنے ماحول کے مطابق صفات پیدا کر کے زندہ رہتی ہیں۔ قطبی ریچھ کی موٹی کھال اور زیرِ جلد چربی انہیں آرکٹک کی برف میں زندہ رہنے کے قابل بناتی ہے۔ کینگرو چوہے صحرا میں اس لیے زندہ رہتے ہیں کیونکہ انہیں پانی پینے کی ضرورت نہیں ہوتی؛ انہوں نے اپنے خوراک میں موجود تھوڑی سی نمی پر زندہ رہنے کی صلاحیت پیدا کی ہے۔
اگرچہ کچھ حیاتیاتی انواع موسمیاتی تبدیلی کے ساتھ مطابقت پیدا کرنے کی دوڑ میں دوسروں سے بہتر کارکردگی دکھاتے ہیں لیکن سب ایسا نہیں کر پاتے، کیونکہ ماحول تیزی سے بدل سکتے ہیں!
ایک آتش فشاں پھٹنے سے کئی موسموں کے لیے اوسط درجہ حرارت کم ہو سکتا ہے، اور ایک جنگل کی آگ خوراک کے ذرائع کو تباہ کر سکتی ہے۔ جب ایسا کچھ ہوتا ہے، تو ایک نوع اچانک یہ محسوس کر سکتی ہے کہ لاکھوں سال کے قدرتی انتخاب کے دوران پیدا ہونے والی صفات اب فائدہ مند نہیں ہیں۔ یہی ارتقائی عدم مطابقت ہے، اور اس کے ممکنہ طور پر تباہ کن نتائج ہو سکتے ہیں۔
امریکی میوزیم آف نیچرل ہسٹری کے پیلیونٹولوجی ڈویژن کی سربراہ، میلانی ہاپکنز، کہتی ہیں کہ انواع ماحولیاتی تبدیلی کا جواب تین مختلف طریقوں سے دیتی ہیں: ”وہ یا تو ایسے مقام پر منتقل ہو جاتی ہیں، جہاں ماحول بہتر ہے، یا وہ ماحول کے مطابق خود کو ڈھال لیتی ہیں، یا پھر وہ ناپید ہو جاتی ہیں۔“ جب کہیں جانے کے لئے جگہ نہیں ہوتی اور ماحول حیاتیاتی انواع کی ارتقا کی رفتار کے مقابلے میں زیادہ تیزی سے بدل رہا ہوتا ہے، تو ان انواع کا ناپید ہو جانا ناگزیر ہو سکتا ہے۔
تاہم، بعض صورتوں میں اس کے برعکس ہو رہا ہے — حیاتیاتی انواع میں ارتقا بہت تیزی سے ہو رہا ہے۔ لورین بکلی ان سائنسدانوں میں سے ایک ہیں، جو موسمیاتی تبدیلی کے نتیجے میں ارتقائی عدم مطابقت کے کردار پر قریب سے نظر ڈال رہی ہیں۔ بکلی سیئٹل کی یونیورسٹی آف واشنگٹن میں ارتقا اور ماحولیات کا مطالعہ کرتی ہیں۔ وہ کہتی ہیں ”ایک طویل عرصے تک، یہ خیال تھا کہ جاندار ان بدلتے ماحولیاتی دباؤ کے لیے کافی تیزی سے ارتقا نہیں کر پائیں گے“ لیکن ان کی تحقیق سے پتہ چلتا ہے کہ بعض صورتوں میں، ارتقا ممکنہ طور پر بہت تیزی سے ہو رہا ہے۔
بکلی اور ان کی لیب نے جنوبی راکی پہاڑوں میں کولیاس تتلیوں کا مطالعہ کیا ہے اور مختلف بلندیوں پر درجہ حرارت کے جواب میں ایک مضبوط انتخابی اثر پایا ہے۔ ان کا ماننا ہے کہ یہ ارتقائی عدم مطابقت قائم کر سکتا ہے۔
مثال کے طور پر، موسمیاتی تبدیلی کی غیر موجودگی میں، آپ عام طور پر توقع کریں گے کہ پہاڑ کے اوپری حصے میں تتلیاں، جہاں زیادہ سردی ہوتی ہے، زیادہ سیاہ پروں کے ساتھ ارتقا کریں تاکہ وہ زیادہ روشنی جذب کر سکیں اور دن کے زیادہ حصے میں سرگرم رہ سکیں — جیسے صبح کے اوائل میں جب زیادہ سردی ہوتی ہے۔
کچھ آبادیوں نے واقعی اس قسم کی مطابقت پیدا کی ہے، لیکن یہ موسمیاتی تبدیلی کے نتیجے میں درجہ حرارت کے بڑھنے کے بالکل برعکس ہے۔ "یہ ایک وقتی ارتقائی عدم مطابقت ہوگی، جہاں ابتدائی ارتقا ان جانداروں کو اس جگہ پر رکھتا ہے جو مستقبل میں ان کے لیے نقصان دہ ہوگی۔“ دوسرے الفاظ میں، ان کی ابتدائی مطابقت مستقبل میں ان کے لیے مشکلات پیدا کر رہی ہے۔
کسی مختلف ماحول میں منتقل ہونا ماحولیاتی تبدیلی کے نقصان دہ اثرات سے بچنے کا ایک طریقہ ہے، لیکن یہ ردعمل ہمیشہ انواع کے لیے طویل مدت میں فائدہ مند نہیں ہوتا۔ بکلی نے ان چھپکلیوں کا بھی مطالعہ کیا ہے جو حالات کے بدلنے پر مختلف مسکنوں میں منتقل ہو جاتی ہیں، اگرچہ یہ حکمت عملی قلیل مدت میں مفید ہے، لیکن موسمیاتی تبدیلی کے زیادہ شدید ہونے کے ساتھ یہ الٹا پڑ سکتی ہے اور چھپکلیوں کے پاس جانے کے لیے کوئی اور جگہ نہیں ہوتی۔ بکلی کہتی ہیں، ”وہ بنیادی طور پر پہلے سے بھی بدتر صورت حال میں ہوتی ہیں، اگر وہ وقت کے ساتھ اس دباؤ کو محسوس کرتیں اور آہستہ آہستہ ارتقا کرتیں، تو بہتر تھا۔“
لیکن بہت سی انواع میں یہ ارتقا کافی تیزی سے نہیں ہوتا، پھر بھی بہت سے مثالوں کے باوجود کہ جانور دنیا کے بدلنے کے ساتھ مطابقت پیدا کر رہے ہیں — پرندے اپنے گھونسلے بنانے کے اوقات بدل رہے ہیں، سرسوں کے پودے پہلے سے زیادہ پھول رہے ہیں — زیادہ تر انواع کے لیے، ارتقا موسمیاتی تبدیلی کی رفتار کے برابر نہیں چل پاتی۔
مختلف عوامل، جیسے تولید کی شرح، آبادی میں جینیاتی تنوع کی مقدار، اور افراد کے بالغ ہونے میں لگنے والا وقت، یہ متاثر کرتے ہیں کہ انواع ماحولیاتی تبدیلیوں کا کتنی تیزی اور کتنی اچھی طرح جواب دیتے ہیں۔ لیکن 2019 کے ایک مطالعے کے مطابق جس نے 13 ممالک میں مکڑیاں، کیڑے، امیبیئن، رینگنے والے جاندار، پرندے، اور ممالیہ جانداروں کے درجہ حرارت اور/یا بارش میں تبدیلیوں کا جواب دینے کے طریقوں کا جائزہ لیا، یہ ممکن ہے کہ بہت سی انواع موسمیاتی تبدیلی سے بچنے کے لیے کافی تیزی سے مطابقت حاصل نہ کر سکیں۔
بدقسمتی سے، بہت سی انواع ارتقائی عدم مطابقت کا شکار ہوں گی، ایک ایسی دنیا میں پھنس جائیں گی جس کے لیے وہ اب مطابقت پذیر نہیں ہیں، اور ان کی انواع کی بقا خطرے میں ہوگی۔
لہٰذا ارتقائی عدم مطابقت کے مسائل کا حل تلاش کرنا بہت ضروری ہے۔ اس کے لیے کچھ ممکنہ طریقے یہ ہو سکتے ہیں:
1. قدرتی ماحول کی بحالی:
جنگلات کی بحالی، دریاؤں کی صفائی، اور ماحولیاتی تحفظ کے اقدامات کر کے قدرتی ماحول کو دوبارہ اصل حالت میں لانے کی کوشش کی جا سکتی ہے۔
2. غذائی عادات کی تبدیلی:
صحت مند غذائی عادات کی طرف واپسی، جیسے کہ قدرتی اور غیر مصنوعی غذاؤں کا استعمال، ارتقائی عدم مطابقت کے اثرات کو کم کر سکتا ہے۔
3. شہری منصوبہ بندی:
شہری منصوبہ بندی میں سبزے کی فراوانی، شور کم کرنے کے اقدامات، اور صحت مند رہائشی حالات فراہم کر کے انسانی صحت کو بہتر بنایا جا سکتا ہے۔
ارتقائی عدم مطابقت ایک پیچیدہ مسئلہ ہے جو تیزی سے بدلتے ہوئے ماحول کی وجہ سے پیدا ہوتا ہے۔ اس کے اثرات زندگی کے مختلف پہلوؤں پر مرتب ہوتے ہیں، جنہیں سمجھنے اور حل کرنے کی ضرورت ہے۔ قدرتی ماحول کی بحالی، غذائی عادات کی تبدیلی، اور بہتر شہری منصوبہ بندی کے ذریعے ہم اس مسئلے کا حل تلاش کر سکتے ہیں۔ ارتقائی عدم مطابقت کو سمجھنا اور اس کا سدباب کرنا آج کے دور کی اہم ضروریات میں سے ایک ہے، تاکہ ہم اپنی اور آنے والی نسلوں کے لیے بہتر مستقبل یقینی بنا سکیں۔
نوٹ: اس فیچر کی تیاری میں آنلائن ڈسکور میگزین میں شائع ایوری ہرٹ کے آرٹیکل سے مدد لی گئی ہے۔
