سابق امریکی صدر ڈونلڈ ٹرمپ نے روسی صدر ولادیمیر پیوٹن سے کہا ہے کہ وہ جو بائیڈن کے بیٹے کے غیر قانونی عمل سے متعلق معلومات فراہم کریں
خبر رساں ادارے اے ایف پی کے مطابق ڈونلڈ ٹرمپ نے امریکی ٹی وی چینل کو دیے گئے ایک انٹرویو میں الزام عائد کیا ہے کہ روسی دارالحکومت ماسکو کے میئر کی اہلیہ نے صدر جو بائیڈن کے بیٹے ہنٹر بائیدن کو پینتیس لاکھ ڈالر دیے تھے
ریپبلکن جماعت سے تعلق رکھنے والے سابق صدر ڈونلڈ ٹرمپ کا کہنا تھا ”یہ بہت بڑی رقم ہے اور صدر ولادیمیر پیوٹن کو اس کا علم ہوگا، انہیں یہ معلومات جاری کرنی چاہیے“
ڈونلڈ ٹرمپ نے ایک مرتبہ پھر ان الزامات کا اعادہ کیا ہے جو وہ سال 2020ع کی صدارتی مہم کے دوران اپنے سیاسی حریفوں پر عائد کرتے رہے تھے
سابق صدر اس سے پہلے بھی یہ کہتے آئے ہیں کہ صدر جو بائیڈن سے سیاسی فائدے حاصل کرنے کی غرض سے ہنٹر بائیڈن نے ماسکو کے میئر یوری لژکوف کی اہلیہ ایلینہ بتورینا سے رقم لی تھی
خیال رہے کہ ڈونلڈ ٹرمپ نے اپنے دور حکومت میں یوکرین کے صدر ولودمیر زیلنسکی پر دباؤ ڈالا تھا، کہ وہ جو بائیڈن کے بیٹے سے متعلق معلومات فراہم کریں، جو یوکرین کی ایک کمپنی کے ساتھ کام بھی کر چکے ہیں
ان الزامات کی بنیاد پر سال 2019ع میں امریکی ایوان نمائندگان نے سابق صدر ڈونلڈ ٹرمپ کے خلاف مواخذے کی کارروائی کا آغاز کیا تھا
جبکہ سال 2016ع کی صدارتی مہم کے دوران ڈونلڈ ٹرمپ نے روس سے مطالبہ کیا تھا کہ وہ صدارتی امیدوار ہیلری کلنٹن کے خلاف لاپتہ ای میلز فراہم کریں
جولائی 2016ع میں پریس کانفرنس کے دوران ڈونلڈ ٹرمپ نے روسی حکومت کو مخاطب کرتے ہوئے کہا تھا کہ ’امید ہے کہ آپ تیس ہزار لاپتہ ای میلز تلاش کر لیں گے، اس کے بدلے میں ہمارے میڈیا کی طرف سے آپ کو بھاری انعام ملے گا“
