بھارت میں ایک کسان نے دیوی کو خوش کرنے کے لیے اپنی زبان کاٹ ڈالی، پولیس کے مطابق یہ واقعہ بھارت کے شہر نئی دہلی میں پیش آیا، کسان کی حالت تشویشناک بتائی جاتی ہے
غیر ملکی خبر رساں ادارے ‘اے ایف پی’ کی رپورٹ کے مطابق بھارت کی شمالی ریاست اترپردیش کے مشہور مندر میں چالیس سالہ کسان نے چھری سے اپنی زبان کاٹ لی تھی، جس کے بعد وہاں موجود ہجوم میں خوف و ہراس پھیل گیا
تفتیشی افسر ابھیلاش تیواری نے بتایا کہ کسان اور اس کی بیوی نے اس سے قبل مذہبی رسومات ادا کیں، جس کے بعد انہوں نے چھری سے اپنی زبان کاٹی اور مندر کے دروازے پر رکھ دی
تفتیشی افسر کا کہنا تھا ”مندر میں تعینات ہمارے افسران نے پوجا کرنے والے دوسرے لوگوں کی مدد سے اسے ہسپتال پہنچایا“
افسر نے بتایا کہ اُن کی بیوی کا کہنا تھا کہ ’میرے شوہر نے دیوی کو خوش کرنے کے لیے اپنی زبان کی ’قربانی‘ دی ہے‘ تاہم وہ وضاحت نہیں کر سکیں کہ ان کے شوہر نے ایسا کیوں کیا
بھارت میں عموماً اس نوعیت کے واقعات سامنے آتے رہتے ہیں، جن میں شہری اپنے دیوی دیوتاؤں کو خوش کرنے کے لیے جسمانی اعضا کو نقصان پہنچاتے ہیں اور بعض اوقات انسانی جان تک کی قربانی دے دیتے یا بَلی چڑھاتے ہیں، اسی طرح کچھ لوگ دیوتاؤں کو خوش کرنے کے لیے عجیب و غریب حرکتیں بھی کرتے ہیں
یاد رہے کہ گزشتہ سال بھی بھارت کی دو ریاستوں میں اس طرح کے دو واقعات رپورٹ ہوئے تھے، جب دو نوجوانوں نے اپنے دیوتاؤں کو خوش کرنے کے لیے اپنی زبانیں کاٹ لی تھیں
سال 2020ع میں ایک ہندو پجاری نے مقامی کسان کا سَر قلم کر کے اپنے دیوتا کے سامنے پیش کر دیا تھا، پجاری نے دعویٰ کیا تھا کہ انہیں خواب میں دیوی نے ایسا کرنے کے لیے کہا تھا۔
