آسام – بھارتی حکام نے دعویٰ کیا ہے کہ اسٹار فٹبالر ڈیاگو میراڈونا کی چوری ہونے والی کسٹمائزڈ گھڑی برآمد کر لی گئی ہے اور دبئی میں مبینہ چوری کرنے والے شخص کو بھی گرفتار کر لیا گیا ہے
فرانسیسی خبر رساں ادارے اے ایف پی کے مطابق ہفتے کو پولیس نے بتایا کہ انہوں نے واجد حسین کو شمال مشرقی ریاست آسام میں حراست میں لیا اور سوئس ساختہ ’ہبلوٹ‘ گھڑی برآمد کی ہے۔ وہ دبئی میں مبینہ چوری کے بعد بھارت فرار ہو گیا تھا
پولیس کے مطابق سینتیس سالہ واجد حسین دبئی میں قائم ایک فرم میں سنہ 2016ع سے سکیورٹی گارڈ کے طور پر کام کر رہا تھا ، جہاں میراڈونا سے متعلق چیزیں محفوظ تھیں
انہوں نے کہا کہ سنگل ایڈیشن گھڑی، جس کی قیمت تقریباً چھبیس ہزار ڈالر سے زائد ہے، اس کی پشت پر میراڈونا کی تصویر بنی ہے اور ان کی جرسی کے نمبر 10 کے ساتھ دستخط بھی ہیں۔ل
شیو ساگر کے سپرنٹنڈنٹ پولیس راکیش روشان نے دبئی حکام سے موصول ہونے والی معلومات کے حوالے سے اے ایف پی کو بتایا کہ اگرچہ بہت سی محدود ایڈیشن گھڑیاں دستیاب ہیں، لیکن اس گھڑی کو میراڈونا کے لیے ان کی مرضی کے مطابق بنایا گیا تھا
واضح رہے کہ فٹبال کے عظیم ترین کھلاڑیوں میں شمار کیے جانے والے میراڈونا گذشتہ سال نومبر میں ساٹھ سال کی عمر میں انتقال کر گئے تھے
آسام کے وزیراعلیٰ ہمانتا بسوا شرما کا کہنا تھا کہ مقامی پولیس نے دبئی میں اپنے ہم منصبوں سے خفیہ اطلاع ملنے کے بعد ملزم کو گرفتار کیا
بھارتی پولیس کا مزید کہنا تھا کہ زیر حراست شخص نے الزامات کی تردید کی ہے اور کہا ہے کہ وہ اگست میں اپنے بیمار والد کی دیکھ بھال کے لیے آسام میں اپنے آبائی گھر واپس آیا تھا.
