دنیائے کھیل کے بڑے ایونٹ فٹبال ورلڈ کپ کی آمد آمد ہے اور دنیا بھر میں اس حوالے سے مختلف سرگرمیاں بھی دیکھنے میں آ رہی ہیں
ایسی ہی ایک انوکھی سرگرمی ارجنٹائن میں بھی دیکھی گئی، جہاں جنوبی امریکا کے اس ملک کو فٹبال ورلڈکپ جتوانے والے سابق لیجنڈ میراڈونا کی یاد میں مختص کیے گئے ایک جہاز کی نمائش کی گئی
خبر رساں ایجنسی کی رپورٹ کے مطابق 12 سیٹوں والے ٹینگو ڈی ون زیرو ایس جہاز کو ایک ارجنٹائن کی کمپنی نے فنانس کیا ہے، جسے اڑتے میوزیم کا نام دیا گیا ہے
اطلاعات کے مطابق یہ جہاز ارجنٹائن اور دنیا کے دیگر حصوں سے ہوتا ہوا رواں سال فٹ بال ورلڈکپ کے لیے قطر پہنچے گا
طیارے کی رونمائی رواں ہفتے بیونس آئرس میں ہوئی، جس میں ڈیاگو آرمینڈو میراڈونا کے اہل خانہ اور سابق ساتھی کھلاڑیوں نے بھی شرکت کی
اس موقع پر لیجنڈ کھلاڑی کی بیٹی ڈلما میراڈونا نے کہا ”میراڈونا کے لیے لوگوں کا پیار تصور سے بھی کہیں زیادہ ہے“
طیارے کو میراڈونا کی خوبصورت تصویروں سے مزیّن کیا گیا ہے، جن میں وہ تصویر بھی شامل ہے جس میں وہ ورلڈ کپ کی ٹرافی کو چوم رہے ہیں
جبکہ طیارے کے پروں پر ان کے ان دو شہرہ آفاق گولز کی تصویریں آویزاں ہے، جو انہوں نے 1986ع میں ورلڈ کپ کوارٹر فائنل میں انگلینڈ کے خلاف اسکور کر کے ارجنٹینا کو فتح سے ہمکنار کیا تھا
صرف یہی نہیں، رپورٹ میں بتایا گیا ہے کہ کاک پٹ میں مصنوعی ذہانت (آرٹیفیشل انٹیلیجنس) کے ذریعے آنجہانی کھلاڑی سے بات بھی کی جا سکے گی ، جبکہ 1986ع کی ٹیم کے دیگر کھلاڑیوں سے منسلک اشیا بھی جہاز میں نمائش کے لیے رکھی گئی ہیں
طیارہ نجی استعمال کے لیے بھی دستیاب ہوگا، جبکہ اس کے بعد اسے چیریٹی کے لیے نیلام کر دیا جائے گا
واضح رہے کہ سال 2020ع نومبر میں دل کا دورہ پڑنے کے باعث عالمی شہرت یافتہ اسٹار فٹبالر میراڈونا انتقال کر گئے تھے.
