سندھ کے ضلع میرپورخاص کے ایک گاؤں سے تعلق رکھنے والی ایتھلیٹ ثناء کو اسپیشل اولمپکس پاکستان کی ٹیم نے تلاش کیا اور آج وہ جرمنی کے شہر برلن میں اسپیشل اولمپکس ورلڈ گیمز میں حصہ لے رہی ہیں
ذہنی معذروی سے لڑتی ثناء الفاظ کی درست ادائیگی سے قاصر ہیں اور یہی وجہ ہے کہ وہ کبھی اپنے بارے میں بتا نہیں سکیں کہ وہ کیسا محسوس کرتی ہیں
لیکن پھر ایک دن ایسا ہوا کہ اسپیشل اولمپکس پاکستان کی ایک ٹیم ان کے بارے میں سن کر انہیں ڈھونڈتی ہوئی ان کے گھر تک پہنچ گئی
اس ٹیم نے ثنا کے والدین کو اس بات پر قائل کرنے کی کوشش کی کہ ان کا دماغ مختلف طریقے سے کام کرتا ہے اور دیگر انسانوں سے الگ سوچتا ہے
اسپیشل اولمپکس پاکستان کی ٹیم کی اس بات کو سمجھنے میں ثناء کے والدین کو کافی وقت لگا
بالآخر، مسلسل قائل کرنے کے بعد، وہ ہچکچاتے ہوئے انہیں کھیلوں میں حصہ لینے کی اجازت دینے پر راضی ہوگئے
ثناء کی دادی اور چچا نے انہیں میرپورخاص کے کھیلوں کے میدان میں لانا شروع کیا، جو ان کے گاؤں سے اَسی کلومیٹر دور تھا۔ آہستہ آہستہ اس میں باقاعدگی آتی گئی اور ثناء کو ہر بدھ، جمعے اور اتوار کو کھیلوں کی تربیت کے لیے گراؤنڈ میں لایا جانے لگا۔ جلد ہی، ان سب پر یہ واضح ہو گیا کہ ثنا کے پاس ایک سے زیادہ صلاحیتیں ہیں
مسلسل پریکٹس سے ثناء نے ذاتی اور ایتھلیٹک دونوں سطحوں پر بہتری لانا شروع کی اور چھ ماہ کی تربیت اور مشق کے بعد، انہوں نے پاکستان ایئر فورس بیس کراچی میں ذہنی معذور بچوں کے لیے منعقدہ کھیلوں کے مقابلے میں حصہ لیا اور ایک سو میٹر دوڑ میں پہلی اور دو سو میٹر کی دوڑ میں چوتھے نمبر پر آئیں
اس مقابلے نے ان کے والدین اور ان کی برادری کے افراد کی سوچ کو یکسر بدل کر رکھ دیا
ثنا نے کھیلوں کی تربیت کا سلسلہ جاری رکھا اور پاکستان کے مختلف شہروں میں دیگر کیمپوں اور سرگرمیوں میں حصہ لیا، جہاں انہوں نے بہترین کارکردگی کا مظاہرہ کیا
حال ہی میں، نیشنل گیمز میں ثناء نے پشاور میں آٹھ سو میٹر دوڑ میں پہلی پوزیشن حاصل کی۔ اب وہ اپنے علاقے اور اس سے باہر کے بہت سے علاقوں میں رہنے والے لوگوں کے لیے ایک تحریک بن چکی ہے اور لوگ ان کے ساتھ تصویر لینا پسند کرتے ہیں۔
