اٹلی : ہماری معلومات کے مطابق جدید تاریخ میں یورپ میں سب سے بلند درجہ حرارت ریکارڈ کیا گیا ہے جو اٹلی کے مشہور جزیرے سِسلی میں نوٹ کیا گیا ہے جو 48.8 درجہ سینٹی گریڈ تک نوٹ کیا گیا ہے
اس سے پہلے بھی اٹلی کے کئی جنگلات میں آتشزدگی کے واقعات دیکھے گئے ہیں جن میں پیٹریلیا سوپرانا کا علاقہ سرِفہرست ہے
واضح رہے کہ 11 اگست کو سِسلی میں یہ بلند ترین درجہ حرارت نوٹ کیا گیا ہے جو یورپ میں ریکارڈ شدہ بلند درجہ حرارت سے 0.8 درجے سینٹی گریڈ زیادہ ہے۔ اب یہ یورپ کا سب سے گرم درجہ حرارت قرار پایا ہے
لیکن یہ رحجان دیگر خطوں میں بھی جاری ہے کیونکہ 11 اگست کو ہی تیونس میں 49 درجے سینٹی گریڈ درجہ حرارت ناپا گیا ہے۔ یہ 1982ع میں بلند ترین گرمی سے بھی دو درجے سینٹی گریڈ زائد ہے
اسی طرح افریقہ اور شمالی یورپ میں بھی گرمی کی خوفناک لہر ہے۔ موسم خشک اور شدید گرم ہے جس سے جنگلات میں آگ بھڑک رہی ہے۔ یہی وجہ ہے کہ ایک جانب تو اٹلی نے ہنگامی حالت نافذ کی ہے تو دوسری جانب موسمیاتی کیفیت سے بھی خبردار کیا ہے۔ یونان کے جزیرے ایویا میں اس وقت بھی شعلے بھڑکے ہوئے ہیں اور لوگوں کو کشتیوں کے ذریعے نکالا جارہا ہے۔ شعلوں کی حرارت سے بحیرہ روم میں اتنی گرمی بڑھی ہے کہ ماہرین نے اسے ”گرمی کا گنبد“ کا لقب دے دیا ہے
یاد رہے کہ 1977ع میں ایتھنز میں یورپ کا بلند ترین درجہ حرارت 48 درجے سینٹی گریڈ نوٹ کیا گیا تھا۔ اس کی تصدیق عالمی تنطیم برائے موسمیات (ڈبلیو ایم او) نے بھی کی تھی۔ اب اس نئے درجہ حرارت کو میکسی میلیانو ہریرا نے بھی نوٹ کیا ہے اور ان کے خیال میں جن آلات نے اٹلی ریکارڈ کیا ہے، وہ درست ہیں اور یہ بلند گرمی کا نیا ریکارڈ ہے
دوسری جانب 1850ع سے 1900ع کے درمیان کرہِ ارض کا اوسط درجہ حرارت ایک درجے سینٹی گریڈ تک بڑھ چکا ہے اور اس معمولی اضافے سے بھی دوررس اور منفی اثرات مرتب ہورہے ہیں
حال ہی میں بین الحکومتی پینل برائے آب و ہوا میں تبدیلی (آئی پی سی سی) کی چھٹی رپورٹ منظرِ عام پر آئی ہے جس میں کہا گیا ہے کہ دنیا کا درجہ حرارت بڑھ رہا ہے اور کرہِ ارض پر شدید موسمیاتی کیفیات مزید بڑھیں گی.
